جامبىل وبلىسىنداعى جاڭاتاس ستانتسياسىندا ەكى تەپلوۆوز قاتىسۋىمەن توتەنشە جاعداي تىركەلدى، دەپ حابارلايدى "ادىرنا" ۇلتتىق پورتالى.
الدىن الا مالىمەتتەر بويىنشا، اپات مانەۆرلىك جۇمىستار كەزىندە بولعان.
وقيعا 5 ناۋرىز كۇنى ستانتسيا اۋماعىندا «جاڭاتاس سۋ-جىلۋ» كوممۋنالدىق كاسىپورنىنىڭ كىرمە جولىنا مازۋت تيەلگەن بەس ۆاگوندى جەتكىزۋ بارىسىندا ورىن العان. مانەۆر جاساۋ كەزىندە جامبىل لوكوموتيۆ دەپوسىنا قاراستى مانەۆرلىك تەپلوۆوز بەن «كاپ لوگيستيك» جشس-نە تيەسىلى جەكەمەنشىك 2تە10م ماگيسترالدىق تەپلوۆوزى سوقتىعىسقان.
سوقتىعىسۋ سالدارىنان ديزەل وتىنى تيەلگەن ۆاگوندار مەن لوكوموتيۆتەرگە زاقىم كەلگەن. دەگەنمەن، الدىن الا دەرەكتەرگە سايكەس، وقيعا كەزىندە ەشكىم زارداپ شەكپەگەن.
بەيرەسمي اقپاراتقا سايكەس، مانەۆرلىك تەپلوۆوز ءماشينيسىنىڭ ماس كۇيدە بولۋى مۇمكىن ەكەنى ايتىلۋدا. الايدا بۇل دەرەك ازىرگە رەسمي تۇردە راستالعان جوق.
«قازاقستان تەمىر جولى» كومپانياسىنىڭ مالىمەتىنشە، وقيعانىڭ سەبەپتەرى مەن ءمان-جايىن انىقتاۋ ءۇشىن ارنايى كوميسسيا قۇرىلعان. قازىر ماماندار اپات بولعان جەردە تەكسەرۋ جۇمىستارىن جۇرگىزىپ، تەحنيكالىق قاۋىپسىزدىك تالاپتارىنىڭ ساقتالۋىن زەرتتەپ جاتىر.
