يران پرەزيدەنتى ماسۋد پەزەشكياننىڭ كەشىرىم سۇراعانىنا قاراماستان، ەلدىڭ قارۋلى كۇشتەرى كورشى مەملەكەتتەرگە جاسالعان شابۋىلدارىن توقتاتپاعانى حابارلاندى. بۇل تۋرالى بىرقاتار تاياۋ شىعىس ەلدەرىنىڭ رەسمي ورگاندارى مالىمدەدى، دەپ حابارلايدى “ادىرنا” ۇلتتىق پورتالى DW سايتىنا سىلتەپ.
بىرىككەن اراب امىرلىكتەرىنىڭ ء(باا) بيلىگى 7 ناۋرىز كۇنى تاڭەرتەڭنەن باستاپ يران تاراپىنان ەل اۋماعىنا 16 زىمىران مەن 121 ۇشقىشسىز ۇشۋ اپپاراتى (درون) ۇشىرىلعانىن حابارلادى. رەسمي مالىمەتكە سايكەس، بۇل شابۋىلدار يران پرەزيدەنتىنىڭ كورشى ەلدەرگە قارسى اسكەري ارەكەتتەردى توقتاتۋعا ۋادە بەرگەنىنەن كەيىن دە جالعاسقان.
سونىمەن قاتار، كاتار مەن باحرەيننىڭ اسكەري ۆەدومستۆولارى دا ءوز اۋماقتارىنا يران تاراپىنان شابۋىل جاسالعانىن مالىمدەدى. الايدا ولار وقيعاعا قاتىستى ناقتى مالىمەتتەر مەن شىعىندار تۋرالى تولىق اقپارات بەرمەدى.
ال ساۋد ارابياسى ءوز اۋە قورعانىس كۇشتەرى شايبا مۇناي كەن ورنىندا بىرنەشە دروندى جانە ەر-رياد قالاسىنىڭ وڭتۇستىك-شىعىسىندا ورنالاسقان امەريكالىق اۋە بازاسىنىڭ ماڭىندا ەكى زىمىراندى اۋەدە جويعانىن حابارلادى.
بۇعان دەيىن يراننىڭ مەملەكەتتىك تەلەارناسى پرەزيدەنت ماسۋد پەزەشكياننىڭ حالىققا جاساعان ۇندەۋىن جاريالاعان بولاتىن. وندا ول كورشى مەملەكەتتەردىڭ اۋماعىنا جاسالعان سوققىلار ءۇشىن كەشىرىم سۇراپ، ەگەر ولاردىڭ اۋماعىنان يرانعا قارسى شابۋىلدار جاسالماسا، تەگەران باسقا ەلدەرگە سوققى جاساۋدى توقتاتاتىنىن ايتقان.
پرەزيدەنتتىڭ ايتۋىنشا، مۇنداي شەشىمدى يسلام رەسپۋبليكاسىنىڭ ۋاقىتشا باسقارۋشى كەڭەسى قابىلداعان.
الايدا كەيىنىرەك يران قارۋلى كۇشتەرىنىڭ ورتالىق قولباسشىلىعى مالىمدەمە جاساپ، امەريكالىق جانە يزرايلدىك اسكەري نىساندارعا قارسى سوققىلار ولاردىڭ قاي جەردە ورنالاسقانىنا قاراماستان جالعاسا بەرەتىنىن حابارلادى.
