8 ناۋرىزدا يران يسلام رەسپۋبليكاسىنىڭ پرەزيدەنتى ماسۋد پەزەشكيان ازەربايجان باسشىسى يلحام اليەۆپەن تەلەفون ارقىلى سويلەستى، دەپ حابارلايدى «ادىرنا» ءتىلشىسى.
ول اڭگىمە بارىسىندا ناحچىۆانعا جاسالعان شابۋىلعا يراننىڭ قاتىسى جوق ەكەنىن مالىمدەگەن.
«يران تاراپىنىڭ باستاماسىمەن پرەزيدەنتتەر ماسۋد پەزەشكيان مەن يلحام اليەۆ تەلەفون ارقىلى سويلەستى. ازەربايجان مەملەكەتىنىڭ باسشىسى ناحچىۆاندا بولعان وقيعانى جان-جاقتى تەرگەۋدىڭ ماڭىزدىلىعىن اتاپ ءوتتى»، – دەلىنگەن حابارلامادا.
پەزەشكيان بۇل وقيعا مىندەتتى تۇردە تەكسەرىلەتىنىن جەتكىزگەن.
5 ناۋرىز كۇنى ازەربايجاننىڭ ناحچىۆان اۋەجايى ماڭىندا يران اۋماعىنان ۇشىرىلعان ەكى دروننىڭ قۇلاعانىن حابارلاعان بولاتىن. سونىڭ سالدارىنان اۋەجاي عيماراتىنا زاقىم كەلىپ، ەكى ادام جاراقات العان. ازەربايجان تاراپى باكۋ قاجەت بولعان جاعدايدا جاۋاپ شارالارىن قابىلداۋ قۇقىعىن وزىندە قالدىراتىنىن مالىمدەگەن.
ال يران قارۋلى كۇشتەرىنىڭ باس شتابى ازەربايجاننىڭ اۋە كەڭىستىگىنە دروندار ۇشىرىلدى دەگەن اقپاراتتى جوققا شىعارىپ، بولعان وقيعاعا ءيزرايلدى جاۋاپتى دەپ مالىمدەگەن.
