قىتايدىڭ سىرتقى ىستەر ءمينيسترى ۆان ي تاياۋ شىعىستاعى سوعىس ارەكەتتەرىن دەرەۋ توقتاتۋعا شاقىردى، دەپ حابارلايدى «ادىرنا» ءتىلشىسى «سينحۋا» اگەنتتىگىنە سىلتەمە جاساپ.
ول سوعىستىڭ كۇشپەن شەشىلەتىن ماسەلە ەمەستىگىن اتاپ ءوتتى. ايتۋىنشا، قاقتىعىستار جاڭا وشپەندىلىكتى تۋدىرىپ، بۇرىننان شيەلەنىسكەن جاعدايدى ودان ءارى ۋشىقتىرادى.
مينيستر پارسى شىعاناعى ايماعىنداعى ەلدەردىڭ، ونىڭ ىشىندە يراننىڭ ەگەمەندىگى، قاۋىپسىزدىگى جانە تەرريتوريالىق تۇتاستىعى قۇرمەتتەلۋى كەرەك ەكەنىن جانە ولارعا قول سۇعۋعا بولمايتىنىن جەتكىزدا. سونداي-اق ول يران مەن تاياۋ شىعىستاعى جاعدايدى دۇرىس رەتتەۋدىڭ نەگىزگى پرينتسيپتەرىن ءتۇسىندىردى.
«كۇشتىلەردىڭ ارەكەتى اردايىم دۇرىس بولا بەرمەيدى. الەم دجۋنگلي زاڭىنا قايتا ورالماۋى ءتيىس»، – دەدى ۆان ي پەكيندە وتكەن بريفينگتە.
ودان بولەك، ول ايماقتاعى ەلدەردىڭ ىشكى ىستەرىنە ارالاسپاۋعا شاقىردى.
«بيلىكتى كۇش قولدانباي وزگەرتۋ نەمەسە الماستىرۋ ارەكەتتەرى قولداۋ تاپپايدى. بارلىق تاراپ مۇمكىندىگىنشە تەزىرەك كەلىسسوزدەر ۇستەلىنە ورالىپ، تەڭقۇقىلى ديالوگ ارقىلى كەلىسپەۋشىلىكتەردى رەتتەپ، جالپى قاۋىپسىزدىكتى قامتاماسىز ەتۋ ءۇشىن كۇش سالۋى ءتيىس»،-دەدى قىتاي ءسىم باسشىسى.
مينيستر پەكيننىڭ تاياۋ شىعىس ەلدەرىمەن بىرگە جاھاندىق قاۋىپسىزدىك باستاماسىن جۇزەگە اسىرۋعا دايىن ەكەنىن دە ايتتى.
ەسكە سالايىق، 28 اقپاندا اقش پەن يزرايل يرانعا قارسى بىرلەسكەن اسكەري وپەراتسيا باستاعان ەدى.
