اۆستراليا بيلىگى يران ايەلدەر فۋتبول قۇراماسىنىڭ بەس ويىنشىسىنا گۋمانيتارلىق ۆيزا بەردى. بۇل تۋرالى اۆستراليالىق The Nationalnews.com باسىلىمى جازدى، دەپ حابارلايدى "ادىرنا".
اۆستراليانىڭ ىشكى ىستەر ءمينيسترى توني بەرك يراندىق بەس فۋتبولشى ءوز ەلىندە قۋدالانۋى مۇمكىن دەگەن قاۋىپپەن قورعاۋ سۇراعاننان كەيىن ولارعا گۋمانيتارلىق ۆيزالار بەرىلگەنىن راستادى.
ءمينيستردىڭ ايتۋىنشا، سپورتشىلار بريسبەندە وتكەن ايەلدەر اراسىنداعى ازيا كۋبوگى (AFC Women’s Asian Cup) ءتۋرنيرى اياسىندا وڭتۇستىك كورەيا قۇراماسىنا قارسى ماتچ الدىندا يراننىڭ مەملەكەتتىك ءانۇرانىن ورىنداۋدان باس تارتقان. وسىدان كەيىن ولار ەلگە ورالعان جاعدايدا قاۋىپسىزدىگىنە الاڭداپ، اۆستراليادان قورعاۋ سۇراعان.
بەركتىڭ سوزىنشە، فۋتبولشىلار وزدەرىن ساياسي بەلسەندىلەر ەمەس ەكەنىن ايتىپ، تەك قاۋىپسىزدىكتە ءومىر سۇرگىسى كەلەتىنىن جەتكىزگەن. بەرىلگەن گۋمانيتارلىق ۆيزالار ولاردىڭ اۆستراليادا قالىپ، ءومىر سۇرۋىنە، جۇمىس ىستەۋىنە جانە ءبىلىم الۋىنا مۇمكىندىك بەرەدى.
سونىمەن قاتار اۆستراليا بيلىگى مۇنداي ۇسىنىس يران ايەلدەر قۇراماسىنىڭ بارلىق مۇشەلەرىنە دە جاسالعانىن مالىمدەدى. قالعان ويىنشىلارعا ءوز قۇقىقتارى ءتۇسىندىرىلىپ، گۋمانيتارلىق ۆيزا الۋعا ءوتىنىش بەرۋ مۇمكىندىگى ۇسىنىلعان. دەگەنمەن ەلدە قالۋ نەمەسە يرانعا ورالۋ تۋرالى شەشىمدى ءاربىر سپورتشى جەكە قابىلدايدى.
ايتا كەتەيىك، ماتچ الدىندا ءانۇران كەزىندە ءۇنسىز قالۋ ارەكەتى يران ىشىندە قاتتى سىنعا ۇشىرادى. مەملەكەتتىك تەلەارنالار مەن بيلىككە جاقىن مەديا فۋتبولشىلاردى ء«پاتريوتيزمنىڭ جوقتىعى» جانە «سوعىس كەزىندەگى ساتقىندىق» دەپ ايىپتادى. وسى جاعداي ولاردىڭ وتانىنا ورالعان جاعدايدا قاۋىپسىزدىگىنە قاتىستى الاڭداۋشىلىقتى كۇشەيتتى.
