كونستيتۋتسيالىق سوت ەرلى-زايىپتىلاردىڭ بانك قۇپياسىنا قول جەتكىزۋ ماسەلەسىن قارايدى. ءىس بۇرىنعى كۇيەۋىنىڭ جيناقتارى تۋرالى اقپاراتتى الا الماعان ازاماتشا ارىزى نەگىزىندە قوزعالعان، دەپ حابارلايدى «ادىرنا» ءتىلشىسى.
ءوتىنىش نەگىزىندە كونستيتۋتسيالىق سوت «قازاقستان رەسپۋبليكاسىنداعى بانكتەر جانە بانك قىزمەتى تۋرالى» زاڭىنىڭ 50-بابى 4-تارماعىنىڭ قازاقستان رەسپۋبليكاسىنىڭ كونستيتۋتسياسىنا سايكەستىگىن تەكسەرمەك. اتالعان نورماعا سايكەس، بانك قۇپياسىن قۇرايتىن مالىمەتتەر تەك كليەنتتىڭ وزىنە نەمەسە شوت (مۇلىك) يەسىنىڭ كەلىسىمىمەن ءۇشىنشى تۇلعاعا عانا اشىلۋى مۇمكىن.
ازاماتشا كورسەتىلگەن ەرەجە ءىس جۇزىندە ەرلى-زايىپتىلاردىڭ ءبىرىنىڭ ورتاق جيناقتار تۋرالى اقپارات الۋ مۇمكىندىگىن شەكتەيتىنىن، ەرلى-زايىپتىلاردىڭ ورتاق مۇلكىندەگى ۇلەسكە قۇقىقتى ىسكە اسىرۋعا كەدەرگى كەلتىرەتىنىن ايتقان.
وتىنىشتە كورسەتىلگەندەي، نەكەنى بۇزعاننان كەيىن ورتاق مۇلىكتى ءبولۋ تۋرالى تالاپ-ارىز دايىنداۋ بارىسىندا ءوتىنىش بەرۋشى بۇرىنعى جۇبايىنىڭ نەكە كەزەڭىندە جيناقتاعان قارجىلىق قاراجاتى تۋرالى مالىمەتتەردى الا الماعان. وسىعان بايلانىستى ول ەكىنشى دەڭگەيدەگى بانكتەرگە قاتىستى ءتيىستى اقپاراتتى ۇسىنۋ مىندەتىن جۇكتەۋ تۋرالى تالاپ-ارىزبەن سوتقا جۇگىنگەن. الايدا سوت تالاپتاردى قاناعاتتاندىرۋدان باس تارتقان.
وتىرىسقا ءوتىنىش يەسى مەن ونىڭ زاڭ كونسۋلتانتى، پارلامەنت پالاتالارىنىڭ، باس پروكۋراتۋرانىڭ، ۇلتتىق بانكتىڭ، قارجى نارىعىن رەتتەۋ جانە دامىتۋ اگەنتتىگىنىڭ، ادىلەت مينيسترلىگىنىڭ، زاڭناما جانە قۇقىقتىق اقپارات ينستيتۋتىنىڭ، سونداي-اق پارلامەنتاريزم ينستيتۋتىنىڭ وكىلدەرى قاتىسقان.
«كونستيتۋتسيالىق سوتتىڭ قورىتىندى شەشىمى كونستيتۋتسيالىق زاڭنىڭ 65-بابىنا سايكەس كس رەسمي سايتىندا سىلتەمە بويىنشا، «ەگەمەن قازاقستان» جانە «كازاحستانسكايا پراۆدا» گازەتتەرىندە جاريالاناتىن بولادى»،–دەلىنگەن حابارلامادا.
