قازاقستان پرەزيدەنتى قاسىم-جومارت توقاەۆ كونستيتۋتسيا جوباسىنداعى قازاق جانە ورىس ءتىلىنىڭ مارتەبەسىنە قاتىستى پىكىر ءبىلدىردى، دەپ حابارلايدى "ادىرنا".
مەملەكەت باسشىسى ءماسليحات دەپۋتاتتارىنىڭ ءىىى رەسپۋبليكالىق فورۋمىندا «جاڭا كونستيتۋتسيا جوباسىندا ورىس ءتىلىنىڭ مارتەبەسىن تومەندەتىپ جاتىر-مىس دەگەن كۇڭكىل اڭگىمە» تۋرالى ايتقان.
«…بۇل جايىندا جازىلعان ماقالالاردى وقۋدىڭ ءوزى قىزىق. ستيليستيكالىق جانە گرامماتيكالىق قاتەلەردەن اياق الىپ جۇرە المايسىڭ. جاريالانىم اۆتورلارى ورىس ءتىلى ءۇشىن قام جەيدى، بىراق وزدەرى ونى دۇرىس مەڭگەرمەگەن. تۇپتەپ كەلگەندە، جاڭا كونستيتۋتسيا ءماتىنىنىڭ رەسمي قۇجات رەتىندە بىردەي زاڭدى كۇشكە يە قازاق جانە ورىس تىلدەرىندە جاريالانۋى كوپ نارسەنى اڭعارتپاي ما؟ بۇل جەردە تۇسىنىكتەمە بەرىپ، اقتالۋدىڭ ءوزى ارتىق. وسى ورايدا قازاق ءتىلىنىڭ مارتەبەسى تومەندەدى دەپ بايبالام سالۋدىڭ قاجەتى جوق»، – دەيدى توقاەۆ.
جاڭا كونستيتۋتسيا جوباسىندا «قازاقستان رەسپۋبليكاسىنىڭ مەملەكەتتىك ءتىلى – قازاق ءتىلى» دەپ ناقتى جازىلعان.
«انا ءتىلىمىز تەك كوركەم ادەبيەتتە عانا ەمەس، ەلىمىزدىڭ قوعامدىق-ساياسي ءومىرىنىڭ بارلىق سالاسىندا كەڭىنەن قولدانىلادى. ەڭ ماڭىزدىسى، جاستار اراسىندا قازاقشا سويلەۋ سانگە اينالدى. باسقاشا ايتقاندا، قازاق ءتىلىنىڭ بولاشاعى جارقىن. كەيبىرەۋلەر ءتىل تاعدىرىنا الاڭداعان كەيىپ تانىتىپ، بۇل تاقىرىپتى ساياسي قۇرال رەتىندە پايدالانادى. قازاق جاستارى جاڭاشىلدىققا تەز بەيىمدەلە الۋىمەن ەرەكشەلەنەدى. ولار قازاقشا مەن ورىسشانى قوسا العاندا، ءۇش-ءتورت ءتىلدى ەركىن مەڭگەرەدى. مۇنى اينالامىزدان كۇندە كورىپ ءجۇرمىز»، – دەگەن پرەزيدەنت.
