14 ناۋرىز – كورىسۋ كۇنىنە وراي اتىراۋ قالاسىندا 150-گە جۋىق ونەرپاز ۇلتتىق ءداستۇردى ناسيحاتتادى.
ءىس-شارا يساتاي-ماحامبەت الاڭىندا باستالىپ، قالا كوشەلەرىمەن كوش فورماتىنداعى مەرەكەلىك كەرۋەنگە ۇلاستى. بۇل تۋرالى وڭىرلىك كوممۋنيكاتسيالار قىزمەتى حابارلايدى.
مەرەكەلىك شەرۋ بارىسىندا وركەستر سۇيەمەلدەۋىمەن قازاقتىڭ حالىق اندەرى ورىندالىپ، ۇلتتىق ءداستۇر كورىنىستەرى كوپشىلىك نازارىنا ۇسىنىلدى. «كوش» كەرۋەنى ودان ءارى قالاداعى Infinity Mall جانە Baizaar ساۋدا ورتالىعىندا جالعاسىپ، ونەرپازدار تۇرعىندار مەن قوناقتارعا مەرەكەلىك كوڭىل-كۇي سىيلادى.
سالتاناتتى شەرۋگە ماحامبەت وتەمىسوۆ اتىنداعى اكادەميالىق قازاق دراما تەاترى، دينا نۇرپەيىسوۆا اتىنداعى اكادەميالىق قازاق حالىق اسپاپتار وركەسترى، نۇرمۇحان ءجانتورين اتىنداعى وبلىستىق فيلارمونيا ۇجىمى جانە مادەنيەت باسقارماسىنا قاراستى مەكەمەلەر قاتىستى.
