رەسپۋبليكالىق رەفەرەندۋم اياسىندا ءوتىپ جاتقان «رەفەرەندۋم – 2026» ونلاين مارافونى جالعاسۋدا. 09:00-دە باستالعان شارانىڭ العاشقى ءۇش ساعاتىندا قوعامداعى وزەكتى ماسەلەلەر تالقىلانىپ، يننوۆاتسيالىق جوبالار تانىستىرىلدى.
مەديا كەڭىستىكتە العاش رەت ونلاين مارافوندى جۋرناليستەر روبوت-جۇرگىزۋشىمەن بىرگە رەسمي تۇردە باستادى.
مارافوننىڭ توك-شوۋ الاڭىندا قوعام ءۇشىن وزەكتى ەكى تاقىرىپ — «ينكليۋزيۆتى قوعام» جانە «بالا تاربيەسى: ءداستۇر مەن زاماناۋي ءادىستىڭ قايشىلىعى» تالقىلاندى. «ينكليۋزيۆتى قوعام» تاقىرىبىنداعى ديسكۋسسيا بارىسىندا ەرەكشە قاجەتتىلىگى بار ازاماتتارعا تەڭ مۇمكىندىك جاساۋ، قولجەتىمدى ورتا قالىپتاستىرۋ جانە قوعامداعى ءوزارا قۇرمەت مادەنيەتىن دامىتۋ ماسەلەلەرى ءسوز بولدى. ساراپشىلار ينكليۋزيانىڭ ءبىلىم بەرۋ جۇيەسىندەگى، ەڭبەك نارىعىنداعى جانە قوعامدىق كەڭىستىكتەگى رولىنە توقتالدى.
«بالا تاربيەسى: ءداستۇر مەن زاماناۋي ءادىستىڭ قايشىلىعى» تاقىرىبىنداعى تالقىلاۋدا قازىرگى قوعامداعى تاربيە تاسىلدەرىنىڭ وزگەرۋى، ۇلتتىق قۇندىلىقتار مەن زاماناۋي پسيحولوگيانىڭ ۇيلەسىمى، سونداي-اق اتا-انالاردىڭ جاۋاپكەرشىلىگى ماسەلەلەرى كوتەرىلدى. بۇل تۋرالى وتباسىلىق پسيحولوگ ەرجان مىرزاباەۆ «قازاقتا ءار ءداستۇردىڭ وزىعى بار، توزىعى بار دەپ ايتادى. ءداستۇر – بەلگىلى ءبىر كەزەڭدە حالىقتىڭ ءومىر سۇرۋىنە ىڭعايلانعان ادەت-عۇرىپتاردىڭ جيىنتىعى. سوندىقتان كەيبىر داستۇرلەر ءبىر زاماندا وزەكتى بولسا، باسقا ۋاقىتتا وزەكتىلىگىن جوعالتۋى مۇمكىن” دەپ، ءداستۇر مەن زامان تالابىنىڭ ۇشتاسۋ ماڭىزدىلىعىن اتاپ ءوتتى. سپيكەرلەر بالا تاربيەسىنىڭ قاي قوعامدا دا، قاي جاستا دا ماڭىزدى دەگەن ورتاق پايىمعا توقتالدى.
مەديا شارادا العاش رەت ۇيىمداستىرىلعان يننوۆاتسيا الاڭىندا وتاندىق ونەرتاپقىشتاردىڭ ەرەكشە جوبالارى دا تانىستىرادى. اتاپ ايتقاندا، دتسپ دياگنوزى بار ادامدارعا وتە قولايلى جاسالعان جاڭا اربا كورەمەنگە ۇسىنىلدى. ءبىر قىزىعى وسى قۇرالدى جۇزەگە اسىرعان اۆتور ماۋلەن بەكتۇرعانوۆقا روبوت جۇرگىزۋشى سۇراقتارىن قويىپ، قوعام ءۇشىن پايدالى ەكەنىن اتاپ ءوتتى. سۇحبات سوڭىنان روبوت ءوز بيىمەن كوپشىلىكتى تاڭقالدىردى.
ونلاين مارافون اياسىندا قازاقستان رەسپۋبليكاسىنىڭ ورتالىق رەفەرەندۋم كوميسسياسى جانىنداعى پرەسس-ورتالىقتىڭ رەفەرەندۋم بارىسى تۋرالى رەسمي اقپاراتتارى دا ۇسىنىلۋدا. اتاپ ايتقاندا، داۋىس بەرۋ ۋچاسكەلەرىنىڭ اشىلۋى، داۋىس بەرۋدىڭ باستالۋى، شەتەلدەگى ۋچاسكەلەردىڭ جۇمىسى جانە ازاماتتاردىڭ كەلۋ بەلسەندىلىگى تۋرالى مالىمەتتەر جاريالاندى.
«رەفەرەندۋم – 2026» ونلاين شاراسى اياسىندا كورەرمەندەرگە وسى ۋاقىتقا دەيىن بەلگىلى ونەرپازدار مەن ونەر ۇجىمدارى، اتاپ ايتقاندا قر ۇلتتىق ۇلانىنىڭ ەرلەر حورى، ەلەكترو دومبىرامەن ونەر كورسەتەتىن شەبەر اقتوتى بولىشەۆا، رۋحيا بايدۇكەنوۆا «جوشى» ەتنو-فولكلورلىق ءانسامبلى، «التىن دومبىرا» توبى ونەرلەرىن كورسەتتى. ونەرپازداردىڭ مۋزىكالىق نومەرلەرى گولوگرامما شوۋى ارقىلى ارلەنىپ وتىردى.
قوعامداعى ماڭىزدى تاقىرىپتاردى تالقىلاپ، ساراپشىلار مەن مامانداردىڭ پىكىرىن ورتاعا سالۋعا جانە ەلدەگى يننوۆاتسيالىق باستامالاردى كەڭىنەن تانىستىرۋعا مۇمكىندىك بەرەتىن ونلايىن مارافون ساعات 09:00 - 01:00 ارالىعاندا، 16 ساعاتقا جالعاسادى.
