مايقۇدىق ساياباعى كونستيتۋتسيا كۇنىنە ورايلاستىرىلعان «اتا زاڭعا 30 جىل: تاۋەلسىز مەملەكەتتىڭ بەرىك تۇعىرى» اتتى اۋقىمدى وبلىستىق پاتريوتتار فورۋمىنىڭ باستى الاڭىنا اينالدى.
جيىرما مىڭنان استام ادام بۇكىل ەل ءۇشىن ماڭىزدى كۇندى اتاپ وتۋگە جينالدى.
قاراعاندىلىقتاردى وبلىس اكىمى ەرماعانبەت بولەكپاەۆ قۇتتىقتادى.
ول كونستيتۋتسيا تاۋەلسىزدىكتىڭ بەرىك ىرگەتاسى جانە ءاربىر ازاماتتىڭ قۇقىقتارى مەن بوستاندىقتارىنىڭ كەپىلى بولىپ تابىلاتىنىن، ەلدىڭ دامۋى زاڭدىلىق، قۇقىقتىق ءتارتىپ جانە تۇراقتىلىق قاعيداتتارىن ساقتاماي مۇمكىن ەمەستىگىن اتاپ ءوتتى.
– قۇرمەتتى قاراعاندىلىقتار، كونستيتۋتسيانىڭ 30 جىلدىعى – ەلىمىزدىڭ ءاربىر ازاماتى ءۇشىن ايتۋلى مەرەكە. بۇل ءبىزدىڭ ارقايسىمىزدى قورعايتىن، ەرتەڭگى كۇنگە سەنىمدىلىك بەرەتىن جانە دامۋعا جول اشاتىن زاڭ، – دەيدى ەرماعانبەت بولەكپاەۆ. – كونستيتۋتسيانىڭ باستى قۇندىلىعى – ادام، ونىڭ قۇقىقتارى مەن بوستاندىقتارى. ءبىزدىڭ كونستيتۋتسيا ەلدەگى بەيبىتشىلىك، تۇراقتىلىق پەن دامۋدىڭ نەگىزىنە اينالدى. ەڭ باستىسى، ول ءبىزدىڭ قوعامداعى زاڭ مەن ءتارتىپتىڭ باسىمدىعىن بەكىتتى. پرەزيدەنتىمىز ايتقانداي، كونستيتۋتسيانىڭ مىزعىماس قۇندىلىقتارىنا سۇيەنە وتىرىپ، ءبىز ءادىل قازاقستاندى – بارشاعا بىردەي مۇمكىندىكتەر مەملەكەتىن سالامىز.
فورۋمدا پوليتسيا دەپارتامەنتى مەن «ورتالىق» وڭىرلىك قولباسشىلىعى قىزمەتكەرلەرى ماراپاتتالدى.
ۇزدىك ۋچاسكەلىك ينسپەكتورلار وبلىس اكىمىنىڭ ەكى ميلليون تەڭگە كولەمىندەگى سىيلىعىنا يە بولدى.
ولاردىڭ بارلىعى كاسىبي بايقاۋدىڭ جەڭىمپازدارى.
– ورگانداردا 2010 جىلدان بەرى جۇمىس ىستەپ كەلەمىن. مەن پوليتسيادا بىرنەشە بۋىن قىزمەت اتقارعان اۋلەت وكىلىمىن. اتام ىشكى ىستەر ورگاندارىنىڭ ارداگەرى. باسقا دا تۋىستارىم دا وسى جۇيەدە جۇمىس ىستەيدى. مەنىڭ اكىمشىلىك ۋچاسكەمدە ءبىر جارىم مىڭعا جۋىق ادام تۇرادى. نەگىزىنەن بارلىعى ادال ازاماتتار. مەن «كاسىبىمنىڭ ۇزدىگى» بايقاۋىنا قاتىسىپ، تۇرعىندار ماعان داۋىس بەردى، – دەدى نۇرا اۋداندىق پوليتسيا ءبولىمىنىڭ ۋچاسكەلىك ينسپەكتورى دارحان جاڭابىلوۆ.
وبلىس اكىمىنىڭ ءبىلىم گرانتتارىنا مەكتەپ تۇلەكتەرى يە بولدى.
– مەن وتكەن جىلى مەكتەپتى ءبىتىردىم، ال بيىل قارۇۋ-عا، ارنايى پەداگوگيكا فاكۋلتەتىنە ءتۇستىم. وبلىس اكىمىنىڭ ءبىلىم گرانتىنا يە بولدىم، – دەيدى كاميللا ميللەر. – ماعان وسىنداي مۇمكىندىك بەرىلگەنىنە وتە قۋانىشتىمىن. كاسىبي ءومىرىمدى پەداگوگيكامەن بايلانىستىرعىم كەلەدى. مەن بالالاردى جاقسى كورەمىن جانە ولارمەن جۇمىس ىستەگىم كەلەدى.
مەملەكەتتىك قىزمەت ارداگەرى عابيت تۇياقوۆ ۆەدومستۆولىق ناگرادامەن ماراپاتتالدى.
ال جۇمىسقا العاش قابىلدانعان جاس مەملەكەتتىك قىزمەتكەرلەر انت قابىلدادى. بۇل ۇرپاقتار ساباقتاستىعىنىڭ سيمۆولىنا اينالدى جانە جاس مامانداردىڭ زاڭ مەن ادالدىق نەگىزىندە مەملەكەتكە قىزمەت ەتۋگە دايىندىعىن راستادى.
قاراعاندىلىقتار مەن قالا قوناقتارى ءۇشىن ساياباقتا تەگىن قۇقىقتىق كەڭەستەر جارمەڭكەسى ۇيىمداستىرىلدى. ادىلەت، ەكونوميكالىق تەرگەۋ، توتەنشە جاعدايلار دەپارتامەنتتەرىنىڭ، سونداي-اق ءوڭىردىڭ جەتەكشى جوعارى وقۋ ورىندارىنىڭ ماماندارى زاڭناما، الەۋمەتتىك كەپىلدىكتەر، قۇجاتتاردى رەسىمدەۋ، ازاماتتاردىڭ قۇقىقتارى مەن مىندەتتەرىن قورعاۋ ماسەلەلەرىنە كومەك كورسەتتى.
مەرەكەلىك كوڭىل كۇي ءۇشىن جەرگىلىكتى ارتىستەر مەن اتى اڭىزعا اينالعان قازاقستاندىق «مۋزارت» توبى ونەر كورسەتتى.
