جامبىل وبلىسىنداعى اسكەري بولىمدە قاراۋىل باستىعىنا وق ءتيىپ، قازا تاپتى

جامبىل وبلىسىنداعى اسكەري بولىمدە قاراۋىل باستىعىنا وق ءتيىپ، قازا تاپتى. بۇل اقپاراتتى ىشكى ىستەر مينيسترلىگىنىڭ اسكەري-تەرگەۋ دەپارتامەنتى اسكەريلەندىرىلگەن كۇزەتتىڭ ازاماتتىق قىزمەتكەرى قازا تاپقان دەرەگىن راستادى، دەپ حابارلايدى "ادىرنا".

وقيعا تۋرالى اقپارات الەۋمەتتىك جەلىلەردە تارادى. حابارلامادا 15 ناۋرىز كۇنى قاراۋىلدىڭ ءۇشىنشى پوستىندا كۇزەتشى قارۋدان كەزدەيسوق وق اتىپ، باستىعىنا تيگىزگەنى ايتىلعان.

جارالانعان ادام اۋىر جاعدايدا اسكەري گوسپيتالگە جەتكىزىلگەنىمەن، ونى قۇتقارۋ مۇمكىن بولماعان.

«جامبىل وبلىسىندا اسكەريلەندىرىلگەن كۇزەتتىڭ ازاماتتىق قىزمەتكەرىنىڭ قازا بولۋ فاكتىسى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر. وقيعانىڭ ءمان-جايى بارلىق قاجەتتى تەرگەۋ ارەكەتتەرى مەن پروتسەسسۋالدىق ءىس-شارالار كەشەنى جۇرگىزىلگەننەن كەيىن انىقتالادى»، – دەپ حابارلادى اسكەري-تەرگەۋ دەپارتامەنتى.