ماسكەۋدەگى تەراكتىدە قازا تاپقاندار مەن زارداپ شەككەن قازاقستاندىقتار تۋرالى اقپارات تۇسكەن جوق، دەپ حابارلايدى “ادىرنا” ۇلتتىق پورتالى قر سىرتقى ىستەر مينيسترلىگىنىڭ ءباسپاسوز قىزمەتىنە سىلتەپ.
«قازىر ءبىز جاعدايدىڭ ەگجەي-تەگجەيىن انىقتاپ جاتىرمىز. ماسكەۋدەگى ەلشىلىك جەرگىلىكتى بيلىك ورگاندارىمەن جانە ءتيىستى قىزمەتتەرمەن بايلانىستا. قازا تاپقاندار مەن زارداپ شەككەندەر اراسىندا قازاقستان ازاماتتارىنىڭ بار-جوعى تۋرالى اقپارات جوق. قوسىمشا اقپارات قولجەتىمدى بولعان كەزدە بەرەمىز. قازىر ەلشىلىك 8 (925) 897-71-14 سەنىم تەلەفونىن اشتى»، - دەدى سەنبىگە قاراعان ءتۇنى قر سىرتقى ىستەر مينيسترلىگىنىڭ رەسمي وكىلى ايبەك سمادياروۆ.
ەستەرىڭىزگە سالا كەتەيىك، 22 ناۋرىز كۇنى كەشكە رەسەيدىڭ كروكۋس سيتي حوللىندا بەلگىسىز بىرەۋلەر ءىرى تەراكت جاساعان بولاتىن. الدىن الا مالىمەت بويىنشا، ونداعان ادام قازا تاۋىپ، 100-دەن استامى جارالانعان. كروكۋس سيتي حوللداعى تەراكتىگە بايلانىستى قازاقستان ازاماتتارى ءۇشىن سەنىم تەلەفونى اشىلدى. پرەزيدەنت قاسىم-جومارت توقاەۆ قازاقستان اتىنان ماسكەۋدەگى كروكۋس سيتي حوللداعى لاڭكەستىك ارەكەتتى قاتاڭ ايىپتادى. ايتا كەتەيىك، ۋكراينا لاڭكەستىك ارەكەتكە قاتىسى جوقتىعىن بىردەن ءمالىم ەتتى.
