ناۋرىزناما ونكۇندىگى اياسىندا شاڭىراق كۇنىنە وراي اقتوبە وبلىسىنىڭ بايعانين اۋدانىندا 30 وتباسى باسپانالى بولدى. قاراۋىلكەلدى اۋىلىندا جاڭا كوممۋنالدىق تۇرعىن ۇيلەردىڭ كىلتتەرى سالتاناتتى تۇردە تابىستالدى.
اۋدان تۇرعىندارى ءۇشىن بۇل – كوپتەن كۇتكەن قۋانىشتى ءسات. جاڭا ۇيلەر زاماناۋي تالاپتارعا ساي سالىنعان. پاتەرلەر تولىقتاي گاز، سۋ جانە ەلەكتر جەلىلەرىمەن قامتاماسىز ەتىلگەن. سونىمەن قاتار، ءار ءۇيدىڭ اۋلاسى قورشالىپ، كارىز جۇيەسى سەپتيك ارقىلى جۇرگىزىلگەن.
سالتاناتتى شاراعا اۋدان اكىمى ايبەك كۋپەنوۆ قاتىسىپ، جاڭا قونىس يەلەرىنە پاتەر كىلتتەرىن تابىستادى. ول تۇرعىنداردى ماڭىزدى مەرەكەمەن قۇتتىقتاپ، وڭىردە تۇرعىن ءۇي قۇرىلىسى قارقىن الىپ كەلە جاتقانىن اتاپ ءوتتى.
«مەملەكەت باسشىسىنىڭ تاپسىرماسىنا سايكەس، حالىقتىڭ الەۋمەتتىك جاعدايىن جاقسارتۋ جانە تۇرعىن ۇيمەن قامتاماسىز ەتۋ – ءبىزدىڭ باستى مىندەتىمىز. وسى باعىتتا اۋدانىمىزدا اۋقىمدى جوبالار جۇزەگە اسىرىلىپ جاتىر. بۇل – الەۋمەتتىك ادىلەتتىلىكتىڭ ناقتى كورىنىسى ءارى تۇرعىنداردىڭ ءومىر ساپاسىن ارتتىرۋعا باعىتتالعان ماڭىزدى قادام»، – دەدى اۋدان اكىمى.
ايتا كەتەيىك، جاڭا ۇيلەردىڭ پايدالانۋعا بەرىلۋى اۋىل تۇرعىندارىنىڭ تۇرمىس ساپاسىن جاقسارتۋعا باعىتتالعان. قونىس تويىن تويلاعان وتباسىلار ءۇشىن بۇل باسپانا جاڭا ءومىردىڭ باستاۋى مەن جاڭا مۇمكىندىكتەردىڭ سيمۆولىنا اينالدى.
