تاياۋ شىعىستاعى شيەلەنىس اياسىندا ءيزرايلدىڭ كاسپي تەڭىزى باعىتىنا جاساعان شابۋىلى تۋرالى اقپارات تارادى, دەپ حابارلايدى “ادىرنا”.
يراننىڭ سولتۇستىگىندەگى ستراتەگيالىق ماڭىزى بار بەندەر-ەنزەلي پورتتى قالاسىنا زىمىران سوققىلارى جاسالعانى حابارلاندى. قالا اكىمى موحامماد سالەح زياينىڭ مالىمەتىنشە، شابۋىل سالدارىنان بىرنەشە ماڭىزدى نىسان زارداپ شەككەن. اتاپ ايتقاندا، كەدەن عيماراتتارى، پورت باسقارماسى جانە كەمە قاتىناسى ۇيىمىنىڭ ينفراقۇرىلىمى سوققىعا ۇشىراعان.
يران تاراپىنىڭ حابارلاۋىنشا، شابۋىلدان ادام شىعىنى تىركەلمەگەن. قازىرگى ۋاقىتتا كەلتىرىلگەن ماتەريالدىق شىعىن كولەمى انىقتالىپ جاتىر، ال جاعداي تولىق باقىلاۋعا الىنعان.
يزرايلدىك اقپارات قۇرالدارى بۇل شابۋىلدىڭ اۋقىمدى بولعانىن اتاپ ءوتىپ، پورت ينفراقۇرىلىمىنا ەلەۋلى زيان كەلگەنىن جازادى. مالىمەتتەرگە سايكەس، سوققىلار اۋە جانە تەڭىز باعىتتارى ارقىلى جۇزەگە اسىرىلعان.
بەندەر-ەنزەلي — كاسپي تەڭىزى جاعالاۋىنداعى يراننىڭ ەڭ ءىرى پورتتارىنىڭ ءبىرى ءارى ماڭىزدى ساۋدا-لوگيستيكالىق ورتالىق. بۇل پورت ارقىلى يران، رەسەي جانە ءوڭىردىڭ باسقا ەلدەرى اراسىندا جۇك تاسىمالى جۇزەگە اسادى. سوندىقتان اتالعان شابۋىل كاسپي وڭىرىندەگى كولىك دالىزدەرى مەن ەكونوميكالىق بايلانىستارعا اسەر ەتۋى مۇمكىن.
وسى وقيعاعا بايلانىستى يران پرەزيدەنتى ماسۋد پەزەشكيان ەلدىڭ ەنەرگەتيكالىق جانە ستراتەگيالىق ينفراقۇرىلىمىنا جاسالعان شابۋىلداردى قاتاڭ ايىپتادى. ونىڭ ايتۋىنشا، مۇنداي ارەكەتتەر جاعدايدى كۇردەلەندىرىپ، باقىلاۋدان تىس سالدارعا اكەلۋى مۇمكىن جانە ونىڭ اسەرى تەك ايماقپەن شەكتەلمەي، جاھاندىق دەڭگەيدە سەزىلۋى ىقتيمال.
