كاسپي تەڭىزىندەگى اسكەري وقۋ-جاتتىعۋ كەزىندە اسكەري قىزمەتشىلەردىڭ قازا بولۋىنا قاتىستى ءىس بويىنشا قورعانىس مينيسترلىگى جۇيەسىنىڭ بەس لاۋازىمدى تۇلعاسى ۇستالدى، دەپ حابارلايدى "ادىرنا".
پوليتسيا مالىمەتىنشە، ولاردىڭ قاتارىندا اسكەري-تەڭىز كۇشتەرى باس قولباسشىسىنىڭ ءبىرىنشى ورىنباسارى – شتاب باستىعى، ەكى اسكەري ءبولىمنىڭ كومانديرى، تەڭىز جاياۋ اسكەرلەرى روتاسىنىڭ جانە «قايسار» كاتەرىنىڭ كومانديرلەرى بار.
كۇدىكتىلەر اقتاۋ قالاسى پوليتسيا باسقارماسىنىڭ ۋاقىتشا ۇستاۋ يزولياتورىنا قامالدى. ولارعا قىزمەتكە سالعىرت قاراۋ جانە كورابل جۇرگىزۋ قاعيدالارىن بۇزۋ بويىنشا اۋىر زارداپتارعا اكەپ سوققان قىلمىستىق قۇقىق بۇزۋشىلىق جاسادى دەگەن كۇدىك كەلتىرىلىپ وتىر.
"تەرگەۋ بارىسىندا وقۋ-جاتتىعۋدى ۇيىمداستىرۋ، قاۋىپسىزدىك تالاپتارىنىڭ ساقتالۋى، مەتەورولوگيالىق جاعدايدىڭ ەسكەرىلۋى، كاتەردىڭ تەحنيكالىق جاي-كۇيى جانە جاۋاپتى تۇلعالاردىڭ ارەكەتتەرى تەكسەرىلۋدە.
ءىس بويىنشا سوتقا دەيىنگى تەرگەپ-تەكسەرۋ ءىىم اسكەري-تەرگەۋ بولىمشەسىمەن جۇرگىزىلىپ، باس پروكۋراتۋرا مەن ىشكى ىستەر مينيسترلىگىنىڭ ەرەكشە باقىلاۋىندا", دەلىنگەن حابارلامادا.
ەسكە سالايىق، 24 قىركۇيەكتە ماڭعىستاۋ وبلىسىندا قازاقستان قارۋلى كۇشتەرى اسكەري-تەڭىز كۇشتەرىنىڭ وقۋ-جاتتىعۋى كەزىندە 17 اسكەري قىزمەتشىنى تەڭىز اعىزىپ اكەتكەن. ولار كاسپي جاعالاۋىندا وقۋ-جاۋىنگەرلىك تاپسىرما ورىنداپ جاتقاندا اۋا رايى كۇرت ناشارلاپ، جەل كۇشەيگەن.
قورعانىس مينيسترلىگىنىڭ مالىمەتىنشە، 14 اسكەري قىزمەتشى قازا تاپقان، ۇشەۋى قۇتقارىلدى.
قايعىلى وقيعادان كەيىن 25 قىركۇيەك قازاقستاندا جالپىۇلتتىق ازا تۇتۋ كۇنى بولىپ جاريالانعان بولاتىن.
