بقو چاپاەۆ اۋىلدىق وكرۋگىنىڭ اكىمى بيبولات زەينوللين ماس كۇيىندە كولىك تىزگىندەگەنى ءۇشىن پوليتسيا قىزمەتكەرلەرىمەن ۇستالدى، دەپ حابارلايدى "ادىرنا" ۇلتتىق پورتالى.
وقيعا 12 ناۋرىز كۇنى تۇنگى ۋاقىتتا بولعان. اكىمدى پوليتسيا قىزمەتكەرلەرى الكوگولدىك ماس كۇيدە كولىك باسقارۋ كەزىندە انىقتاعان.
الدىمەن بيبولات زەينوللين ءوزىن ناۋقاس رەتىندە كورسەتىپ، بلوگەردىڭ قوڭىراۋىنا جاۋاپ بەرمەگەنى حابارلاندى. كەيىن ول ماس كۇيىندە كولىك جۇرگىزگەنىن مويىنداعان.
بقو پوليتسيا دەپارتامەنتىنىڭ مالىمەتىنشە، اقجايىق اۋدانى چاپاەۆو اۋىلى ماڭىندا پاترۋلدىك پوليتسيا باتالونى جۇرگىزۋشىنى ماس كۇيىندە انىقتاعان. اتالعان دەرەك بويىنشا قر اكىمشىلىك قۇقىق بۇزۋشىلىقتار كودەكسىنىڭ 608-بابى بويىنشا اكىمشىلىك حاتتاما تولتىرىلىپ، ماتەريالدار سوتقا جولدانعان.
ايتا كەتەيىك، ماس كۇيىندە كولىك جۇرگىزگەنى ءۇشىن 15 تاۋلىككە دەيىن اكىمشىلىك قاماۋعا الۋ جانە 7 جىلعا دەيىن جۇرگىزۋشى كۋالىگىنەن ايىرۋ جازاسى قاراستىرىلعان.
