قازاقستاننىڭ مادەنيەت جانە اقپارات ءمينيسترى ايدا بالاەۆا جۋرناليست بوتاگوز وماروۆانىڭ ۇستالۋىنا بايلانىستى رەسمي مالىمدەمە جاسادى، دەپ حابارلايدى "ادىرنا".
مينيستر بۇل ماسەلەنىڭ ۆەدومستۆو باقىلاۋىندا ەكەنىن اتاپ ءوتتى.
ايدا بالاەۆا ءوز جازباسىندا كەز كەلگەن قۇقىقتىق ماسەلەدە «زاڭ جانە ءتارتىپ» قاعيداتى قاتاڭ ساقتالۋى ءتيىس ەكەنىن ەرەكشە اتاپ ءوتتى. ونىڭ ايتۋىنشا، زاڭ بارشاعا ورتاق جانە بارلىق پروتسەسسۋالدىق ارەكەتتەر سىرتقى ارالاسۋسىز، تەك بەلگىلەنگەن تارتىپپەن جۇزەگە اسىرىلۋى قاجەت.
«مۇنداي جاعدايلاردا زاڭدا كوزدەلگەن بارلىق راسىمدەر اياقتالعانعا دەيىن اسىعىس ءتۇسىندىرۋ جۇمىستارىن جاساۋعا، دالەلسىز قورىتىندىلار شىعارۋعا جانە الدىن الا باعا بەرۋگە جول بەرۋگە بولمايدى»، – دەدى مينيستر
مينيستر ءوز سوزىندە جاقىندا قابىلدانعان «ماسس-مەديا تۋرالى» زاڭنىڭ تالاپتارىنا دا توقتالدى. ول اقپاراتتىڭ دۇرىستىعىن تەكسەرۋ – ءاربىر ءجۋرناليستىڭ تىكەلەي مىندەتى ەكەنىن ەسكە سالدى.
سونىمەن قاتار، زاڭنامادا (68-باپ) جۋرناليستەردى جاۋاپكەرشىلىكتەن بوساتاتىن جاعدايلار دا قاراستىرىلعان. مىسالى، ەگەر اقپارات رەسمي سوزدەردەن وزگەرىسسىز، سوزبە-ءسوز كەلتىرىلگەن بولسا، جۋرناليست جالعان اقپارات تاراتقانى ءۇشىن جاۋاپقا تارتىلمايدى.
ايدا بالاەۆا اتالعان ءىس بويىنشا شەشىمنىڭ ءادىل بولاتىنىنا سەنىم ءبىلدىردى. مينيسترلىك جاعدايدى مۇقيات باقىلاپ وتىر جانە قاجەت بولعان جاعدايدا ءوز قۇزىرەتى اياسىندا شارالار قابىلداۋعا دايىن ەكەنىن جەتكىزدى.
مينيستر وقيعانىڭ ءمانىن بۇرمالاۋ نەمەسە پروتسەسس قاتىسۋشىلارىن نەگىزسىز قارالاۋعا اكەلۋى مۇمكىن مالىمدەمەلەردەن اۋلاق بولۋعا شاقىردى.
ايتا كەتەيىك، بۇعان دەيىن سوت جۋرناليست بوتاگوز وماروۆاعا قاتىستى بۇلتارتپاۋ شاراسىن تاڭداپ، ونى ەكى اي مەرزىمگە ۇيقاماققا العانىن حابارلادىق.
مالىمەتكە سايكەس، جۋرناليست ءجانيا ۇرانقاەۆا بۇل جاڭالىقتى ءوزىنىڭ الەۋمەتتىك جەلىدەگى پاراقشاسىندا جاريالاعان. ونىڭ ايتۋىنشا، وماروۆانىڭ تۇرعىلىقتى مەكەنجايىندا ءتىنتۋ جۇمىستارى جۇرگىزىلەدى.
قازىرگى ۋاقىتتا ءىس بويىنشا تەرگەۋ امالدارى جالعاسىپ جاتىر.
ال 21 ناۋرىزدا ءبىر توپ قازاقستاندىق جۋرناليست پرەزيدەنت قاسىم-جومارت توقاەۆقا قاراتا مالىمدەمە جاساپ، جۋرناليست بوتاگوز وماروۆانىڭ ءىسىن جەكە باقىلاۋىنا الۋدى سۇراعان. بۇعان قوسا، مالىمدەمەدە جالعان اقپارات تاراتۋ بابىن قىلمىستىق كودەكستەن الىپ تاستاۋ جايلى ايتىلعان.
“سىزدەن بوتاگوز وماروۆانىڭ ءىسىن جەكە باقىلاۋعا الۋىڭىزدى جانە ءبىزدى، جۋرناليستەردى، وسىنداي وقيعالاردان قورعاۋىڭىزدى سۇرايمىز، سەبەبى قىلمىستىق كودەكستىڭ 274-بابى كوبىنەسە جۋرناليستەرگە قىسىم جاساۋ قۇرالى رەتىندە قولدانىلادى. كونستيتۋتسيانىڭ گارانتى رەتىندە سىزدەن وسى باپتى دەكريميناليزاتسيالاۋ تۋرالى پرەزيدەنتتىك باستاما كوتەرۋىڭىزدى سۇرايمىز،-” دەگەن ۆيدەومالىمدەمە جۋرناليستەر.
