بەلگىلى جۋرناليست ءارى سپورت كوممەنتاتورى عالىم سۇلەيمەن ومىردەن ءوتتى، دەپ حابارلايدى «ادىرنا» ۇلتتىق پورتالى.
تاراعان اقپاراتقا سۇيەنسەك، ءجۋرناليستىڭ دەنساۋلىعى ءبىر كۇن بۇرىن كۇرت ناشارلاپ، ول شۇعىل تۇردە جانساقتاۋ بولىمىنە جاتقىزىلعان. كەيىن عالىم سۇلەيمەننىڭ جۇرەگىنە بايلانىستى جاعدايى كۇردەلەنگەنى بەلگىلى بولعان.
عالىم سۇلەيمەن – سپورت جۋرناليستيكاسىندا وزىندىك قولتاڭباسى قالىپتاسقان جۋرناليست، كوممەنتاتور ءارى پۋبليتسيست. ول وليمپيادا ويىندارىنان جاساعان رەپورتاجدارى، بوكس پەن كۇرەس جارىستارىنداعى كاسىبي تالداۋلارى جانە سپورت تاقىرىبىنداعى كوركەم جازبالارىمەن تانىلدى.
سۇلەيمەن ناگانو، سيدنەي، ۆانكۋۆەر جانە لوندون وليمپيادالارىندا ءتىلشى رەتىندە جۇمىس ىستەپ، الەمدىك دودالاردىڭ ماڭىزدى ساتتەرىن وقىرمانعا جەتكىزدى. سونىمەن قاتار بىرنەشە الەم جانە ازيا چەمپيوناتتارىنان، حالىقارالىق تۋرنيرلەردەن رەپورتاجدار مەن جولجازبالار جازدى.
كوممەنتاتور رەتىندە ول بوكس، كۇرەستىڭ بارلىق ءتۇرى، اۋىر اتلەتيكا جانە باسقا دا سپورت باعىتتارىنا مامانداندى. قازاقستاندىق سپورتشىلاردىڭ حالىقارالىق ارەناداعى كوپتەگەن ماڭىزدى باسەكەلەرى ونىڭ داۋىسىمەن كورەرمەنگە جەتتى.
عالىم سۇلەيمەن – سەيداحمەت بەردىقۇلوۆ اتىنداعى رەسپۋبليكالىق سپورت جۋرناليستيكاسى سىيلىعىنىڭ لاۋرەاتى. سونداي-اق «شابىت» حالىقارالىق فەستيۆالىندە «جۋرناليستيكا» نوميناتسياسى بويىنشا جەڭىمپاز اتانىپ، ەكى رەت قازاقستاننىڭ ۇزدىك سپورت ءجۋرناليسى دەپ تانىلعان.
ونىڭ جۋرناليستيكاداعى تاعى ءبىر ەرەكشەلىگى – سپورتتى ادەبي تىلمەن جەتكىزە ءبىلۋى. زەرتتەۋشىلەر سۇلەيمەندى سپورت تاقىرىبىن كوركەم ءارى پۋبليتسيستيكالىق تۇرعىدا جازعان قالامگەرلەردىڭ قاتارىندا اتايدى. ونىڭ وچەركتەرى ءبىر كۇندىك جاڭالىقپەن شەكتەلمەي، وقىرمانعا ادەبي شىعارما سەكىلدى اسەر قالدىردى.
