الماتى قالاسىندا 12 جاستاعى وقۋشىعا جاسالعان شابۋىلعا بايلانىستى تەكسەرۋ جۇمىستارى جۇرگىزىلىپ جاتىر، دەپ حابارلايدى "ادىرنا" ۇلتتىق پورتالى.
بالالار ومبۋدسمەنى دينارا زاكيەۆاءنىڭ مالىمەتىنشە، بالا امان، وعان مەديتسينالىق كومەك قاجەت بولماعان. وتباسىنا پسيحولوگيالىق قولداۋ ۇسىنىلعان. قازىر كۇدىكتىنى ىزدەستىرۋ جۇمىستارى جالعاسۋدا.
وقيعا ءمان-جايىنا سايكەس، بەلگىسىز ەر ادام قولىندا پىشاقپەن بالانىڭ جانىنا كەلىپ، ونىڭ ارقاسىنداعى گيتاراسىن تارتىپ الماق بولعان. بالا ايقايلاعاننان كەيىن جاقىن ماڭداعى دۇكەن ساتۋشىسى سىرتقا شىققان. وسىدان سوڭ كۇدىكتى گيتارانى تاستاپ، وقيعا ورنىنان قاشىپ كەتكەن.
ءجاسوسپىرىمنىڭ اناسى باستاپقىدا پوليتسياعا جۇگىنبەگەنىن، سەبەبى بەينەجازبادا كۇدىكتىنىڭ بەت-ءجۇزى انىق كورىنبەيتىنىن ايتقان. سونىمەن قاتار ول بالالار قاۋىپسىزدىگىنە الاڭداۋشىلىق ءبىلدىرىپ، شابۋىلدىڭ كەشكى ۋاقىتتا، ادام كوپ جەردە بولعانىن اتاپ ءوتتى.
