قازاقستان كاسپي قۇبىر كونسورتسيۋمىنىڭ ينفراقۇرىلىمىنا جاسالعان شابۋىلدار سالدارىنان شامامەن 3,8 ملن توننا مۇنايدى ەكسپورتتاي المادى. بۇل تۋرالى ەنەرگەتيكا ءمينيسترى ەرلان اقكەنجەنوۆ مالىمدەدى، دەپ حابارلايدى «ادىرنا» ءتىلشىسى.
ءمينيستردىڭ ايتۋىنشا، اڭگىمە ناقتى قارجىلىق شىعىندار تۋرالى ەمەس، بەلگىلەنگەن مەرزىمدە تاسىمالدانىپ، ساتىلماي قالعان مۇناي كولەمى جونىندە بولىپ وتىر.
«كقك (كاسپي قۇبىر كونسورتسيۋمى) بويىنشا ءبىز شامامەن 3,8 ملن توننا جوعالتتىق. ەگەر جوسپارلار تۋرالى ايتساق، ءيا، ءبىز ونى ورىندادىق»، – دەدى اقكەنجەنوۆ ءماجىلىس كۋلۋارىندا.
سونداي-اق ول شىعىن كولەمى تۋرالى ناقتى جاۋاپ بەرە المايتىنىن اتاپ ءوتتى.
«بۇل مۇناي تاسىمالدانبادى جانە ءالى ساتىلعان جوق. ول الداعى كۋرس بويىنشا ساتىلادى. مۇناي ساتىلعاننان كەيىن عانا مامىلەلەر بويىنشا بارلىق دەرەك قولىمىزدا بولادى، سودان سوڭ ناقتى ساندار تۋرالى ايتۋعا مۇمكىندىك تۋادى»، – دەپ ءتۇسىندىردى ەنەرگەتيكا ءمينيسترى.
اقكەنجەنوۆ مۇنايدىڭ قازىر ساقتاۋدا تۇرعانىن جانە كەيىنىرەك ساتىلاتىنىن ايتىپ، ەكسپورت پەن ەل تابىسىنا اسەرىن تۇپكىلىكتى باعالاۋ تەك ونى ساتقاننان كەيىن عانا مۇمكىن بولاتىنىن جەتكىزدى.
بۇعان دەيىن مينيستر كقك-عا جاسالعان شابۋىلدان كەيىن قازاقستان شىعىن كولەمىن ەسەپتەپ جاتقانىن حابارلاعان بولاتىن.
