مەكتەپتەگى قارۋلى شابۋىل سالدارىنان ءبىر ادام قازا تاپتى

شۆەتسيانىڭ فاگەرستا قالاسىنداعى Brinellskolan ورتا مەكتەبىندە قارۋلى شابۋىل بولىپ، ءبىر ادام قازا تاپتى، دەپ حابارلايدى “ادىرنا” ءتىلشىسى. 

تاعى ءۇش كامەلەتكە تولماعان وقۋشى جاراقات الدى.

TASS دەرەگىنشە، وقيعا 21 تامىزدا جەرگىلىكتى ۋاقىت بويىنشا ساعات 14:06-دا بولعان. شۆەتسيا پوليتسياسىنىڭ مالىمەتىنشە، مەكتەپ عيماراتىنا 18 جاستاعى بۇرىنعى وقۋشى قارۋلانىپ كىرىپ، وقۋشىلارعا شابۋىل جاساعان.

شابۋىل سالدارىنان ءبىر ادام كوز جۇمدى. جاسى 12 مەن 17 ارالىعىنداعى ءۇش كامەلەتكە تولماعان بالا جاراقات العان. ولاردىڭ ەكەۋىنىڭ جاراقاتى اۋىر، بىرەۋىنىڭ جاعدايى جەڭىل. جەڭىل جاراقات العان وقۋشى مەديتسينالىق كومەك كورسەتىلگەننەن كەيىن ۇيىنە جىبەرىلگەن.

پوليتسيا وقيعا ورنىنا بىرنەشە مينۋت ىشىندە جەتكەن. ساعات 14:16 شاماسىندا قۇقىق قورعاۋ قىزمەتكەرلەرى قارۋ قولدانىپ، كۇدىكتىنىڭ اياعىنا وق تيگىزىپ، ونى ۇستاعان.

پوليتسيا مالىمەتىنشە، وقيعا ورنىندا باسقا شابۋىلداۋشىلار انىقتالماعان.

كۇدىكتى قارا كيىم، دۋلىعا جانە بەتىن جاۋىپ تۇراتىن ماسكا كيگەن. شابۋىلعا دەيىن ونىڭ الەۋمەتتىك جەلىدەگى اككاۋنتىندا سەمسەردىڭ سۋرەتى مەن جازبا جاريالانعان.

پوليتسيا 18 جاستاعى كۇدىكتىنىڭ بۇعان دەيىن مەكتەپتە زورلىق-زومبىلىق جاساعانى ءۇشىن سوتتالعانىن حابارلادى. قازىر قىلمىسقا نە سەبەپ بولعانى انىقتالىپ جاتىر.

Brinellskolan — 16-20 جاس ارالىعىنداعى شامامەن 450-470 وقۋشى ءبىلىم الاتىن گيمنازيا. وقۋ جىلى مەكتەپتە بىرنەشە كۇن بۇرىن باستالعان.