بۇۇ دامۋ باعدارلاماسى وزبەكستاندا توتەنشە جاعدايلار مينيسترلىگى جانە ۋزگيدرومەتپەن بىرلەسىپ، مەشىتتەردىڭ سىرتقى داۋىس زورايتقىشتارى ارقىلى توتەنشە جاعدايلار تۋرالى حابارلاندىرۋ جۇيەسىن ەنگىزىپ جاتىر. جۇيە جەتى ايماقتى جانە 6,5 ميلليون ادامدى قامتۋدى جوسپارلاپ وتىر، دەپ حابارلايدى «ادىرنا» ءتىلشىسى Kursiv Uzbekistan-عا سىلتەمە جاساپ.
ەلدى مەكەندەرگە جاقىن ورنالاسقان مەشىتتەرگە ارنايى قۇرىلعىلار ورناتىلعانى ايتىلدى. ولار مۇنارالار مەن قاسبەتتەردە ورنالاسقان سىرتقى داۋىس زورايتقىشتارعا شۇعىل حابارلامالار تاراتادى.
قۇرىلعىلار فەرعانا، جيزاق، قاشقاداريا، نامانگان، سامارقاند، سىرداريا جانە تاشكەنت وبلىستارىنداعى 272 مەشىتكە ورنالاستىرىلعان.
«مەشىتتەر بارلىق ەلدى مەكەندە بار. ولار قۋاتتى سىرتقى داۋىس زورايتقىشتارمەن جابدىقتالعان، ولاردىڭ ەستىلەتىن راديۋسى 500-دەن 2 000 مەترگە دەيىن جەتەدى. حابارلامالار سىرتقا باعىتتالعاندىقتان، قامتۋ ايماعىنداعى بارلىق تۇرعىن بولمەدە بولسىن، دالادا بولسىن، ولاردى ەستيدى. مامانداردىڭ باعالاۋىنشا، وسىلايشا شامامەن 6,5 ميلليون ادام، ونىڭ ىشىندە وسال توپتار قامتىلۋى مۇمكىن»، — دەپ جازادى باسىلىم.
باستامانىڭ اۆتورلارى ەنگىزىلىپ جاتقان تەحنولوگيالاردىڭ ماڭىزدى ارتىقشىلىعى — جۇيەنىڭ اقاۋلارعا توزىمدىلىگى دەپ ەسەپتەيدى. حابارلامالار ۇيالى بايلانىس پەن ەلەكتر قۋاتى وشكەن جاعدايدا دا تاراتىلادى.
باستامانى جاسىل كليمات قورى قارجىلاندىرادى. ماقسات — تەك قاۋىپ-قاتەر تۋرالى ەسكەرتىپ قانا قويماي، ىقتيمال زياندى دا تۇسىندىرەتىن ەرتە ەسكەرتۋ جۇيەسىن قۇرۋ. العاشقى كەزەڭدە جۇيە ەلدىڭ شىعىسىندا ورنالاسقان تىعىز قونىستانعان تاۋلى اۋدانداردا سۋ تاسقىنى، سەل، توپىراق سىرعىۋى جانە قۇرعاقشىلىق تۋرالى حابارلايدى.
«بۇل جەر كوپشىلىكتىڭ «تۋالەتى» ەمەس!». يمام مەشىت اجەتحاناسىنا كىرمەك بولعان جۇمىسشىلاردى قۋىپ شىقتى
