اقوردادا ءحىV قىسقى پاراليمپيادا ويىندارىنىڭ چەمپيونى ەربول حاميتوۆ پەن ونىڭ باپكەرلەرىن ماراپاتتاۋ ءراسىمى ءوتتى، دەپ حابارلايدى «ادىرنا» ءتىلشىسى.
قاسىم-جومارت توقاەۆ يتاليادا وتكەن الەمدىك دودا ەلىمىز ءۇشىن وتە تابىستى بولعانىنا توقتالدى. جاھاندىق باسەكەدە وتانداسىمىز ەربول حاميتوۆ التىن جانە قولا مەدال جەڭىپ العان ەدى.
«ناعىز چەمپيون اتانىپ، ەلىمىزدىڭ مەرەيىن ۇستەم ەتتى، كوك تۋىمىزدى بيىكتە جەلبىرەتتى. بۇل – قازاق پاراسپورتى ءۇشىن تاريحي جەتىستىك. ەربول قازاقتىڭ قايسار، ءور رۋحتى ءارى نامىستى ۇلت ەكەنىن كۇللى الەمگە پاش ەتتى. سوندىقتان، ەڭ الدىمەن، ساعان جانە باپكەرلەرگە شىنايى ريزاشىلىعىمدى بىلدىرەمىن. پاراليمپيادا ويىندارىنا اتتانار ساتتە مەن ەلىمىزدىڭ كوك تۋىن ساعان تابىستادىم. سول ارتىلعان سەنىمدى تولىق اقتاپ، قازاقستانعا جەڭىسپەن ورالدىڭ. كەرەمەت ناتيجەگە جەتتىڭ! سونىڭ ارقاسىندا ەلىمىز كوماندالىق ەسەپتە 18-ءشى ورىنعا تابان تىرەدى. ۇزدىكتەردىڭ ىشىنەن العا شىعىپ، چەمپيون بولۋ وڭاي ەمەس. بۇل – جىلدار بويعى تىنىمسىز دايىندىق پەن قاجىرلى ءارى تاباندى ەڭبەكتىڭ جەمىسى ەكەنى انىق»،– دەدى پرەزيدەنت.
مەملەكەت باسشىسى حIV قىسقى پاراليمپيادا ويىندارىنداعى (يتاليا) جوعارى سپورتتىق جەتىستىكتەرى ءۇشىن ەربول حاميتوۆتى III دارەجەلى «بارىس» وردەنىمەن ماراپاتتادى.
تۋريزم جانە سپورت مينيسترلىگىنە قاراستى دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعىنىڭ جاتتىقتىرۋشىلارى ۆاسيلي كولوميەتس پەن انتون جدانوۆيچكە «پاراسات» وردەنى، سولتۇستىك قازاقستان وبلىسىنداعى ء«ۇمىت» مۇمكىندىكتەرى شەكتەۋلى تۇلعالارعا ارنالعان سپورت كلۋبىنىڭ جاتتىقتىرۋشىسى اسلان توقباەۆقا «قۇرمەت» وردەنى تابىستالدى.
