مەملەكەت باسشىسى قاسىم-جومارت توقاەۆ پەن چەحيا پرەمەر-ءمينيسترى اندرەي بابيش شاعىن قۇرامدا كەلىسسوز جۇرگىزدى. بۇل تۋرالى بۇگىن، 29 ساۋىردە اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
قاسىم-جومارت توقاەۆ اندرەي بابيشكە ءىلتيپات ءبىلدىرىپ، قازاقستان جۇرتشىلىعى ونى چەح رەسپۋبليكاسىندا عانا ەمەس، ەۋروپاعا بەلگىلى ساياسي قايراتكەر رەتىندە جاقسى بىلەتىنىن جەتكىزدى.
«ەكى ەل اراسىندا بۇرىننان تىعىز ءارى دوستىق قارىم-قاتىناس ورناعان. ساۋدا-ساتتىق تابىستى دامۋدا. قوس حالىقتىڭ ءبىر بىرىنە قۇرمەتى زور. ءىرى حالىقارالىق قۇرىلىمدار شەڭبەرىندە بىرلەسە ارەكەت ەتىپ كەلەمىز. بۇل – وتە ماڭىزدى. ەلشىلىكتەرىمىز بەلسەندى جۇمىس ىستەپ تۇر. ورايلى ءساتتى پايدالانا وتىرىپ، وزىڭىزبەن بىرگە چەح كاسىپكەرلەرىنەن قۇرالعان ۇلكەن دەلەگاتسيا الىپ كەلگەنىڭىز ءۇشىن العىس ايتامىن. كەشە استانادا بيزنەس-فورۋم ءوتتى. ونىڭ ناتيجەسى ەلدەرىمىزگە پايدالى بولادى دەپ ويلايمىن. ءوز تاراپىمنان سان قىرلى ىنتىماقتاستىعىمىزدى ودان ءارى دامىتۋعا بار كۇشىمدى سالامىن»،-دەدى پرەزيدەنت.
اندرەي بابيش قوناقجايلىق تانىتقانى ءۇشىن قاسىم-جومارت توقاەۆقا ريزاشىلىعىن ءبىلدىرىپ، ەلىمىزدىڭ ءتۇرلى سالادا جەتكەن جەتىستىكتەرىنە جوعارى باعا بەردى. سونداي-اق بۇگىنگى ساپار ەكىجاقتى قارىم-قاتىناستىڭ جاڭا كەزەڭىنە جول اشاتىنىن ايتتى
ء«بىز قازاقستاندى ستراتەگيالىق سەرىكتەس سانايمىز. بىرلەسكەن كۇش-جىگەردىڭ ارقاسىندا ەكىجاقتى تاۋار اينالىمىنىڭ كولەمىن ارتتىرامىز دەپ سەنەمىن. ەڭ الدىمەن، ەنەرگەتيكا سالاسىنداعى ىقپالداستىقتى نىعايتقىمىز كەلەدى. ءسىزدىڭ ەلدەن ۇزاق مەرزىمدى مۇناي تاسىمالىنا مۇددەلىمىز. ەنەرگەتيكا سالاسىن دامىتۋ ستراتەگيامىز اتوم ەنەرگياسىنا ارقا سۇيەيدى. سوندىقتان قازاقستانعا الەمدەگى ۋران وندىرەتىن ءىرى مەملەكەت رەتىندە دە قىزىعۋشىلىق تانىتامىز»،– دەدى چەحيا پرەمەر-ءمينيسترى.
چەح ۇكىمەتىنىڭ باسشىسى قازاقستاننىڭ ەنەرگەتيكالىق قاۋىپسىزدىگى قۋات ءوندىرۋدىڭ ارتاراپتاندىرىلعان تاسىلىنە نەگىزدەلگەنىنە ءمان بەردى. سونداي-اق ول چەح كومپانيالارىنىڭ اتالعان سالادا بىرلەسكەن جوبالاردى جۇزەگە اسىرۋعا دايىن ەكەنىن راستادى.
اندرەي بابيش قاسىم-جومارت توقاەۆتى جاڭا كونستيتۋتسيا قابىلداۋ بويىنشا رەفەرەندۋمنىڭ تابىستى وتۋىمەن قۇتتىقتاپ، بۇعان مەملەكەتتىلىكتى نىعايتاتىن جانە ەلدى جارقىن بولاشاققا جەتەلەيتىن ماڭىزدى قادام رەتىندە باعا بەردى.
