سوت وتىرىسىندا مادەنيەت جانە سپورت ءمينيسترى، كەزىندە ۇلتتىق مۋزەيدى باسقارعان ارىستانبەك مۇحامەديۇلى اشۋعا ءمىنىپ، ايعايعا باستى. شىمبايىنا باتقان سۇراقتارعا بولا "بۇلقان-تالقان" بولعان ءساتىنىڭ ۆيدەوسى الەۋمەتتىك جەلىدە تارادى، دەپ حابارلايدى "ادىرنا" ۇلتتىق پورتالى.
سوت وتىرىسىندا پروكۋرور كۋاگەردەن ۇندىستانداعى «التىن ادامنىڭ شەرۋى» كورمەسى جايلى ەگجەي-تەگجەيلى سۇراپ جاتقاندا ۇلتتىق مۋزەيدىڭ ەكس-باسشىسى ءوزىن-ءوزى ۇستاي الماي، ايعايعا باسادى. بۇرىنعى مينيستر قازىرگى باسشىلىقتىڭ "ۇستانىمى" مەن "ادىلەتتى قازاقستان" يدەياسىن العا تارتىپ، پروكۋروردىڭ قىزمەتىن سىنايدى. داۋىسى زورايىپ، اشۋ قىسقان ساتىندە قاسىم-جومارت كەمەلۇلىنىڭ تۋعان كۇنى كەلىپ قالعانىن دا سوت زالىندا وتىرعانداردىڭ ەسىنە سالىپ وتەدى.
پوسموترەت ەتۋ پۋبليكاتسيۋ ۆ Instagram
ەستەرىڭىزگە سالا كەتەيىك، 2022 جىلدىڭ 28 مامىرىندا سوت سانكتسياسىمەن ۇلتتىق مۋزەي ديرەكتورى ارىستانبەك مۇحامەديۇلىنا قاتىستى «كۇزەتپەن ۇستاۋ» بۇلتارتپاۋ شاراسى تاڭدالدى. تەرگەۋ «التىن ادامنىڭ الەم مۇراجايلارى بويىنشا شەرۋى» حالىقارالىق كورمەسىن وتكىزۋگە، سونداي-اق «قازاقستاننىڭ ۇلتتىق كيەلى نىساندارى مەن مۋزەي قورلارىن جالپىمەملەكەتتىك فوتوگراممەتريالىق 3D-سكانەرلەۋ» جانە «قازاقستان رەسپۋبليكاسىنىڭ ۇلتتىق تسيفرلىق كينوكوللەكتسياسىن تسيفرلاندىرۋ» جوبالارىنا بولىنگەن بيۋدجەت قاراجاتىن ۇرلاۋ فاكتىلەرى بويىنشا جۇرگىزىلگەن بولاتىن.
ودان بولەك، ارىستانبەك مۇحامەديۇلىنىڭ مادەنيەت جانە سپورت ءمينيسترى لاۋازىمىندا بولعان كەزىندە تۋىستارىنىڭ جانە ۇلەستەس تۇلعالارىنىڭ مەنشىگىنە «سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبى» رمقك، «قازاق ەنتسيكلوپەدياسى» اق جانە «قازاق عىلىمي-زەرتتەۋ مادەنيەت ينستيتۋتى» جشس زاڭسىز بەرۋگە قاتىستىلىعى تەكسەرىلدى.
تەرگەلگەن قىلمىستىق ىستەر بويىنشا مەملەكەتكە كەلتىرىلگەن زالالدىڭ الدىن الا سوماسى شامامەن 7 ملرد تەڭگە دەپ باعالانعان ەدى.
بۇدان بۇرىنعى وتىرىستا ادۆوكات ەكس-مينيستر ارىستانبەك مۇحامەديۇلىن قاماۋدا ۇستاۋ ءتارتىبىن مىرزاقاماققا اۋىستىرۋدى سۇراعان بولاتىن.
"ادىرنا" ۇلتتىق پورتالى
