موڭعوليانىڭ پرەمەر-ءمينيسترى گومبوجاۆىن زاندانشاتار وتستاۆكاعا كەتۋ تۋرالى شەشىم قابىلدادى. ونىڭ ءوتىنىشى ۇلى مەملەكەتتىك حۋرالدىڭ (پارلامەنت) پلەنارلىق وتىرىسىندا قارالىپ، دەپۋتاتتاردىڭ 74%-ى قولدادى.
بۇل شەشىم بۇعان دەيىن بيلەۋشى موڭعول حالىق پارتياسى (محپ) جابىق وتىرىسىندا جاريالانعان بولاتىن. پارتيانىڭ باس حاتشىسى يانگۋگين سودبااتار بۇل ماسەلە الداعى ۋاقىتتا زاڭناماعا سايكەس پارلامەنت كوميتەتتەرى مەن جالپى وتىرىستا قارالاتىنىن مالىمدەدى.
پرەمەر-ءمينيستردىڭ وتستاۆكاسى ەلدەگى ساياسي داعدارىس اياسىندا ورىن الدى. نەگىزگى وپپوزيتسيالىق كۇش – دەموكراتيالىق پارتيا (دپ) 19 ناۋرىزدان باستاپ پارلامەنت جۇمىسىنا بويكوت جاريالاعان. وپپوزيتسيا جەتەكشىسى نيام-وسورىن ۋچرال باستاعان دەپۋتاتتار بيلەۋشى پارتيا كوشباسشىسىنىڭ ءبىر مەزگىلدە پارلامەنت سپيكەرى قىزمەتىن اتقارۋىنا قارسى شىقتى. ولار بۇل لاۋازىمدار ءبولىنۋى ءتيىس دەپ سانايدى: سپيكەر وپپوزيتسيا وكىلى بولۋى كەرەك، ال پرەمەر-مينيستر قىزمەتىن بيلەۋشى پارتيا جەتەكشىسى اتقارۋى قاجەت.
پارتيا كەڭەسىندە ساياسي كەلىسپەۋشىلىكتەرمەن قاتار، جاھاندىق فاكتورلار اسەرىنەن كۇردەلەنگەن الەۋمەتتىك-ەكونوميكالىق جاعداي دا تالقىلاندى. وسى احۋال جانە پارلامەنت جۇمىسىنىڭ تۇرالاۋىنا بايلانىستى زاندانشاتار ءوز وكىلەتتىگىن توقتاتۋ تۋرالى شەشىم قابىلداعان.
پلەنارلىق وتىرىستا سويلەگەن گومبوجاۆىن زاندانشاتار:
«مەن ءوز قىزمەتىمە جابىسىپ وتىرعان جوقپىن. مەملەكەت پەن حالىق مۇددەسىن ءبىرىنشى ورىنعا قويا وتىرىپ، وكىلەتتىگىمدى توقتاتۋ تۋرالى شەشىم قابىلدادىم. بۇل تەك قىزمەت تاپسىرۋ ەمەس، ماڭىزدى مۇددەلەر ءۇشىن بىرىگە ءبىلۋدىڭ ۇلگىسى»، – دەدى.
سونداي-اق ول سوڭعى توعىز ايداعى ۇكىمەت جۇمىسىنىڭ ناتيجەلەرىن اتاپ ءوتتى. ونىڭ ايتۋىنشا، 2025 جىلى مەملەكەتتىك شىعىستار العاش رەت 2,2 تريلليون تۋگريككە قىسقارعان. كومىر ەكسپورتى 90 ميلليون تونناعا جەتىپ، جالپى ەكسپورت كولەمى 15,8 ميلليارد اقش دوللارىن قۇراعان. كاشەمير ەكسپورتى 4,7 ەسە وسسە، ەت ەكسپورتى 25,7%-عا ارتقان. ەكونوميكالىق ءوسىم 2,6%-دان 6,8%-عا دەيىن جەدەلدەپ، ينفلياتسيا 8,3%-دان 6,5%-عا دەيىن تومەندەگەن. تولەم بالانسى 600 ميلليون دوللار تاپشىلىقتان 1 ميلليارد دوللار پروفيتسيتكە جەتىپ، ۆاليۋتالىق رەزەرۆتەر 7 ميلليارد دوللارعا دەيىن ۇلعايعان.
«بۇل جاي عانا ساندار ەمەس، دۇرىس ساياساتتىڭ ناتيجەسى»، – دەپ اتاپ ءوتتى ول.
گومبوجاۆىن زاندانشاتار 2025 جىلعى 13 ماۋسىمدا موڭعوليانىڭ 34-پرەمەر-ءمينيسترى قىزمەتىنە كىرىسكەن. يركۋتسكىدە قارجى-ەكونوميكا ماماندىعىن العان. ەڭبەك جولىندا بانك سالاسىندا قىزمەت ەتىپ، 2004 جىلى العاش رەت پارلامەنت دەپۋتاتى بولىپ سايلانعان. 2009–2012 جىلدارى سىرتقى ىستەر ءمينيسترى، ال 2020–2024 جىلدارى ۇلى مەملەكەتتىك حۋرال توراعاسى قىزمەتىن اتقارعان.
پلەنارلىق وتىرىس قورىتىندىسى بويىنشا، زاندانشاتار جاڭا ۇكىمەت باسشىسى تاعايىندالعانعا دەيىن پرەمەر-مينيستر مىندەتىن ۋاقىتشا اتقارادى.
