اتىراۋ وبلىسىنداعى جانگەلدين اۋىلىندا قاراباليندەر وتباسىنىڭ قازاسىنا قاتىستى تەرگەۋ جالعاسىپ جاتىر – نەگىزگى كۇدىكتى سۇلتان سارسەماليەۆكە ەكى جانە ودان دا كوپ ادامدى ءولتىرۋ عانا ەمەس، بىرنەشە رەت جاسالعان كىسى ءولتىرۋ ايىبى دا تاعىلىپ وتىر، دەپ حابارلايدى “ادىرنا”.
سونىمەن قاتار ءىس اياسىندا قوسىمشا ەپيزودتار بار:
• ۇرلىق (قر قك 188-بابى 2-بولىگى)
• الاياقتىق (قر قك 190-بابى)
پروكۋراتۋرانىڭ مالىمەتىنشە، بۇل قازا بولعانداردىڭ جەكە زاتتارىن يەمدەنۋ جانە ولاردىڭ مالىن ساتىپ جىبەرۋ دەرەكتەرىنە قاتىستى.
ادۆوكاتتاردىڭ تۇسىندىرۋىنشە، «ەكى جانە ودان دا كوپ ادامدى ءولتىرۋ» ءبىر ەپيزودقا قاتىستى بولسا، «قايتالانعان كىسى ءولتىرۋ» قىلمىستىڭ ءارتۇرلى ۋاقىتتا جاسالعانىن بىلدىرەدى.
ەكى ايىپ تا قر قك 99-بابىنىڭ 2-بولىگىنە جاتادى. بۇل باپ بويىنشا 15 جىلدان 20 جىلعا دەيىن باس بوستاندىعىنان ايىرۋ نەمەسە ءومىر بويىنا سوتتاۋ جازاسى قاراستىرىلعان.
قوعامداعى رەزونانس پەن كۇدىكتىنىڭ ەلدەن قاشۋعا ارەكەت جاساعانىن ەسكەرسەك، ساراپشىلار سوت ءومىر بويىنا باس بوستاندىعىنان ايىرۋ جازاسىن تاعايىنداۋى مۇمكىن ەكەنىن جوققا شىعارمايدى.
قوسىمشا باپتار – ۇرلىق پەن الاياقتىق – جالپى جازاعا ەنگىزىلەدى، الايدا ادەتتە جەڭىلىرەك جازالار قاتاڭ جازاعا سىڭىرىلەدى.
ەسكە سالايىق، بۇعان دەيىن اتىراۋ وبلىسىنداعى جانگەلدين اۋىلىنان ەرلى-زايىپتى مەن ولاردىڭ ەكى ەرەسەك بالاسى بار وتباسىنىڭ حابار-وشارسىز كەتكەنى بەلگىلى بولعان ەدى.
ال 6 قاڭتاردا جانتۇرشىگەرلىك دەرەك بەلگىلى بولدى. ءۇيدىڭ جانىنداعى قورادان ەرلى-ءزايىپتىلاردىڭ مايىتى تابىلعان.
كەيىن قۇقىقتىق ستاتيستيكا جانە ارنايى ەسەپكە الۋ ورگاندارىنىڭ پورتالىندا كۇدىكتى رەتىندە مارقۇم زەينەتكەرلەردىڭ كۇيەۋ بالاسى سۇلتان سارسەماليەۆتىڭ اتى-ءجونى كورسەتىلگەن جازبا جاريالاندى. ول جۇبايىمەن بىرگە حالىقارالىق ىزدەۋگە الىندى.
ودان كەيىن يندونەزيادا كۇدىكتىنىڭ ۇستالعان ساتتەگى فوتو-ۆيدەوسى جاريالاندى. كۇدىكتىلەر يندونەزيادان ەلگە جەتكىزىلدى.
