باعدات قالاسىندا بەلگىسىز ادامدار امەريكالىق جۋرناليست شەللي كيتتلسوندى ۇرلاپ كەتكەن. كۇدىكتىلەردىڭ ءبىرى ۇستالدى، دەپ حابارلايدى «ادىرنا» ءتىلشىسى INA اقپارات اگەنتتىگىنە سىلتەمە جاساپ.
يراك ىشكى ىستەر مينيسترلىگىنىڭ مالىمەتىنشە، 31 ناۋرىز كۇنى كەشكە ءتورت بەلگىسىز ادام شەتەلدىك ءجۋرناليستى ۇرلاپ اكەتكەن.
قاۋىپسىزدىك كۇشتەرى دەرەۋ قىلمىسكەرلەردى قۋدالاۋ وپەراتسياسىن باستاپ، بارلاۋ دەرەكتەرىنە سۇيەنە وتىرىپ، ولاردىڭ قوزعالىسىن باقىلاۋعا العان. كەيىن كۇدىكتىلەردىڭ ءبىرى ۇستالعان.
«قۋدالاۋ جانە ىزدەستىرۋ ناتيجەسىندە قىلمىسكەرلەرگە تيەسىلى اۆتوكولىك توقتاتىلدى، ول قاشۋ كەزىندە اۋدارىلىپ قالعان. قاۋىپسىزدىك كۇشتەرى كۇدىكتىلەردىڭ ءبىرىن ۇستاپ، قىلمىس جاساۋ كەزىندە پايدالانىلعان كولىكتەردىڭ ءبىرىن تاركىلەدى»، – دەلىنگەن مينيسترلىك مالىمدەمەسىندە.
قازىرگى ۋاقىتتا پوليتسيا قالعان ۇرلاۋشىلاردى جانە ءجۋرناليستىڭ ءوزىن ىزدەستىرىپ جاتىر.
ربك مالىمەتىنشە، ۇرلانعان شەللي كيتتلسون BBC, Politico جانە Al-Monitor باسىلىمدارىمەن ىنتىماقتاستىق ورناتقان. ونىڭ نە سەبەپتى ۇرلانعانى ازىرگە بەلگىسىز. باسىلىم سونداي-اق وڭىردە يران قولداۋ كورسەتەتىن قارۋلى توپتار ارەكەت ەتەتىنىن، ولاردىڭ بۇعان دەيىن يراكتاعى اقش نىساندارىنا شابۋىل جاساعانىن اتاپ ءوتتى.
