الماتىدا قالا تۇرعىندارىنا شابۋىل جاساپ، مازاسىن العان جاسوسپىرىمدەر ۇستالدى، دەپ حابارلايدى "ادىرنا".
جاس بۇزاقىلار تاجىكستان ازاماتى ەكەنى انىقتالدى. ەندى ولار ەلدەن شىعارىلماق.
پوليتسيا دەپارتامەنتى ءباسپاسوز قىزمەتى مالىمەتىنشە، بالالاردىڭ اگرەسسيۆتى ءارى ورەسكەل مىنەز-قۇلقى تۇسىرىلگەن ۆيدەو الەۋمەتتىك جەلىدە تاراعاننان كەيىن مەدەۋ مەن المالى اۋداندىق پوليتسيا باسقارمالارى تەكسەرۋ جۇمىستارىن باستاعان.
"كامەلەتكە تولماعاندار انىقتالىپ، اۋماقتىق پوليتسيا بولىمشەلەرىنە جەتكىزىلدى. جاسوسپىرىمدەردىڭ تاجىكستان ازاماتتارى ەكەنى بەلگىلى بولدى. بارلىعى كامەلەتكە تولماعانداردى بەيىمدەۋ ورتالىعىنا ورنالاستىرىلىپ، ولارمەن پروفيلاكتيكالىق جۇمىستار جۇرگىزىلىپ جاتىر", - دەپ حابارلادى پوليتسيا.
جاسوسپىرىمدەردىڭ زاڭدى وكىلدەرى بالا تاربيەلەۋ جونىندەگى مىندەتتەرىن تيىسىنشە ورىنداماعانى ءۇشىن اكىمشىلىك جاۋاپكەرشىلىككە تارتىلعان.
"بۇل ادامدارعا قاتىستى قازاقستاننىڭ كوشى-قون زاڭناماسى اياسىندا ولاردى ەل اۋماعىنان شىعارۋدى قاراستىراتىن شارالار قابىلدانىپ جاتىر. قازىرگى ۋاقىتتا ءاربىر دەرەك بويىنشا تەكسەرۋ جۇرگىزىلىپ جاتىر، ونىڭ قورىتىندىسى بويىنشا كامەلەتكە تولماعانداردىڭ ءىس-ارەكەتىنە قۇقىقتىق باعا بەرىلەدى", - دەدى پد وكىلدەرى.
ەسكە سالساق، كەشە جەلىدە الماتىداعى جاسوسپىرىمدەردىڭ وعاش مىنەز-قۇلقىنا قاتىستى شاعىمدار جازىلعان ۆيدەو تاراعان بولاتىن. قالا تۇرعىندارىنىڭ ايتۋىنشا، بالالار ءدامحانا كەلۋشىلەرىنە جاقىنداپ، اقشا تالاپ ەتكەن، ال باس تارتقاندارعا سەس كورسەتىپ، تاس پەن ورىندىق لاقتىرعان.
