اقتاۋ قالاسىندا «Aqtau International School» مەكتەبىندە قر وقۋ-اعارتۋ مينيسترلىگى مەن ماڭعىستاۋ وبلىسى ءبىلىم باسقارماسىنىڭ ۇيىمداستىرۋىمەن «ادىستەمەلىك قىزمەتتىڭ ترانسفورماتسياسى: يننوۆاتسيا، ساپا، تيىمدىلىك» تاقىرىبىندا ءىىى رەسپۋبليكالىق ادىسكەرلەر فورۋمى ءوتىپ جاتىر، دەپ حابارلايدى قوعامدىق كوممۋنيكاتسيا ورتالىعى.
ءىس-شارانىڭ ماقساتى - ەلىمىزدىڭ ءبىلىم بەرۋ سالاسىنداعى ادىستەمەلىك قىزمەتتىڭ وزەكتى ماسەلەلەرىن تالقىلاۋ. اتالعان فورۋمعا ماڭعىستاۋ وبلىسى اكىمىنىڭ ورىنباسارى اببات ورىسباەۆ، قر وقۋ-اعارتۋ مينيسترلىگى ىبىراي التىنسارين اتىنداعى ۇلتتىق ءبىلىم اكادەمياسىنىڭ «عىلىمي-ادىستەمەلىك سۇيەمەلدەۋ» ورتالىعىنىڭ ديرەكتورى دۋلات امانجولوۆ، وبلىستىق ءبىلىم باسقارماسىنىڭ قىزمەتكەرلەرى، وبلىستىق ورتالىقتاردىڭ باسشىلارى، اۋدان، قالا بويىنشا ءبىلىم ءبولىمىنىڭ، وقۋ-ادىستەمەلىك ورتالىقتارىنىڭ باسشىلارى، ماڭعىستاۋ وبلىسىنان جانە باسقا وڭىرلەردەن 450-گە جۋىق ادىسكەرلەر مەن مەكتەپ ۇستازدارى قاتىستى.
ماڭعىستاۋ وبلىسى اكىمىنىڭ ورىنباسارى اببات ورىسباەۆ ادىسكەرلەردى فورۋمنىڭ باستالۋىمەن قۇتتىقتادى.
-بۇگىنگى كۇندە سىزدەر ءوز تاجىريبەلەرىڭىزدى ءبولىسىپ، جاڭا ادىستەمەلەردى تالقىلاپ، ءبىلىم سالاسىن ودان ءارى دامىتۋعا ۇلەس قوساسىزدار. مۇنداي كەزدەسۋلەر جاڭا يدەيالارعا جول اشادى، شىعارماشىلىق ويلاۋدى ارتتىرادى جانە ءبىلىم بەرۋ ساپاسىن جوعارىلاتۋعا مۇمكىندىك بەرەدى. فورۋم سىزدەرگە شابىت بەرسىن، پىكىرتالاستار جەمىستى، ۇسىنىستارىڭىز ناقتى ناتيجەلەرگە جەتسىن. بارلىقتارىڭىزعا ساتتىلىك پەن تابىس تىلەيمىن!، - دەدى اببات ورىسباەۆ
قر وقۋ-اعارتۋ مينيسترلىگى ىبىراي التىنسارين اتىنداعى ۇلتتىق ءبىلىم اكادەمياسىنىڭ «عىلىمي-ادىستەمەلىك سۇيەمەلدەۋ» ورتالىعىنىڭ ديرەكتورى دۋلات امانجولوۆ فورۋمدا ادىستەمەلىك ورتالىقتاردىڭ تيىمدىلىگىن ارتتىرۋعا ارنالعان ۇسىنىستار قاراستىرىلاتىنىن ايتتى.
-بۇگىنگى ءىس-شارادا ادىستەمەلىك ورتالىقتاردىڭ جۇمىسىن جەتىلدىرۋ جولدارى قاراستىرىلىپ، ولاردىڭ تيىمدىلىگىن ارتتىرۋعا باعىتتالعان ناقتى ۇسىنىستار ازىرلەنەدى. فورۋم ەكى كۇنگە جوسپارلانعان. ونىڭ اياسىندا پلەنارلىق ءبولىم جانە جەتى باعىت بويىنشا سەكتسيالىق وتىرىستار وتەدى. سەكتسيالىق وتىرىستار بارىسىندا قاتىسۋشىلار تاجىريبە الماسىپ، زاماناۋي تاسىلدەردى تالقىلايدى، - دەدى دۋلات امانجولوۆ.
