اقمولا وبلىسىندا مەكتەپتەردىڭ جاڭا وقۋ جىلىنا دايىندىعىن باقىلاۋدىڭ نەگىزگى كەزەڭى اياقتالدى. سانيتاريالىق-ەپيدەميولوگيالىق قىزمەت ماماندارى 500-دەن استام مەكتەپ پەن 460-تان استام اس بلوگىنا مونيتورينگ جۇرگىزدى. بۇل تۋرالى بريفينگ بارىسىندا اقمولا وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ساۋلە سادۆاكاسوۆا مالىمدەدى.
قازىرگى تاڭدا دەپارتامەنتتىڭ باقىلاۋىندا 520-عا جۋىق جالپى ءبىلىم بەرەتىن مەكتەپ پەن 475 اس بلوگى بار. 2025–2026 وقۋ جىلىندا ماماندار 29 مەكتەپ پەن 11 اس بلوگىنا تەكسەرۋ جۇرگىزىپ، ونىڭ قورىتىندىسى بويىنشا اكىمشىلىك شارالار قابىلداندى.
بيىل ءبىلىم بەرۋ ۇيىمدارىنا سانيتاريالىق باقىلاۋ جۇرگىزۋ ءتاسىلى وزگەردى. زاڭناماعا ەنگىزىلگەن وزگەرىستەرگە سايكەس، نىساندارعا بارىپ، مونيتورينگ جۇرگىزۋگە مۇمكىندىك بەرىلدى. بۇل مەكتەپتەردىڭ جاڭا وقۋ جىلىنا دايىندىعىن، ال اس بلوكتارىنىڭ وقۋشىلاردى تاماقتاندىرۋدى ۇيىمداستىرۋعا ازىرلىگىن الدىن الا باعالاۋعا مۇمكىندىك بەرەدى.
«باقىلاۋدىڭ جاڭا فورماتى نىسانداردىڭ وقۋ جىلى باستالعانعا دەيىنگى دايىندىعىن الدىن الا باعالاۋعا مۇمكىندىك بەرەدى. بۇل بۇزۋشىلىقتاردى ەرتە انىقتاپ، ولاردى ۋاقىتىلى جويۋعا مۇمكىندىك بەرۋ ءۇشىن ماڭىزدى»، – دەدى ساۋلە سادۆاكاسوۆا.
2026–2027 وقۋ جىلىنا دايىندىق اياسىندا 1 ماۋسىم مەن 1 شىلدە ارالىعىندا ماماندار 503 مەكتەپ پەن 462 اس بلوگىنا مونيتورينگ جۇرگىزدى. وتكەن وقۋ جىلىندا پايدالانۋعا بەرىلگەن 16 مەكتەپ مونيتورينگكە ەنگىزىلگەن جوق.
مونيتورينگ ناتيجەسىندە 300-گە جۋىق نۇسقاما بەرىلدى. نەگىزگى تالاپتار جوندەۋ جۇمىستارىن جۇرگىزۋ، جارىقتاندىرۋ قۇرىلعىلارىن اۋىستىرۋ، جەلدەتكىش قولشاتىرلارىن ورناتۋ، قوقىس جيناۋعا ارنالعان كونتەينەرلەرمەن قامتاماسىز ەتۋ جانە نىسانداردىڭ سانيتاريالىق جاعدايىنا قاتىستى باسقا دا ماسەلەلەرگە بايلانىستى بولدى.
«قازىرگى ۋاقىتتا بەرىلگەن نۇسقامالاردىڭ ورىندالۋىن تەكسەرىپ جاتىرمىز. انىقتالعان بۇزۋشىلىقتاردىڭ جويىلۋى بويىنشا اقپاراتقا تالداۋ جۇرگىزىلۋدە. بۇل جۇمىس جالعاسىپ جاتىر»، – دەدى سپيكەر.
ماماندار اس بلوكتارىنىڭ دايىندىعىنا دا ەرەكشە نازار اۋداردى. مونيتورينگ بارىسىندا قاجەتتى رۇقسات قۇجاتتارىنسىز جۇمىس ىستەپ كەلگەن نىساندار انىقتالدى. ولارعا قاتىستى جەدەل دەن قويۋ شارالارى قابىلداندى.
سونىمەن قاتار مەكتەپتەردەگى تاماقتاندىرۋ ساپاسىن ارتتىرۋ جۇمىستارى جالعاسۋدا. 2025 جىلعى 1 قىركۇيەكتەن باستاپ ءبىلىم بەرۋ ۇيىمدارىندا بىرىڭعاي تاماقتانۋ ستاندارتى ەنگىزىلدى. ول بالالاردىڭ جاس ەرەكشەلىگىنە، مەكتەپتە بولۋ ۇزاقتىعىنا، ماۋسىمدىق ەرەكشەلىكتەرگە جانە ارنايى ديەتالىق قاجەتتىلىكتەرگە سايكەس اس مازىرىنە قويىلاتىن تالاپتاردى قامتيدى.
قازىرگى تاڭدا وبلىستا شامامەن 63 مىڭ بالا ىستىق تاماقپەن قامتىلعان. ونىڭ 54 مىڭنان استامى – 1–4 سىنىپ وقۋشىلارى.
جاڭا ءتاسىلدىڭ ءىس جۇزىندە قانشالىقتى ءتيىمدى ەكەنىن باعالاۋ ءۇشىن كوكشەتاۋ قالاسىندا ءۇش مودەلدىك مەكتەپ انىقتالدى. بۇل مەكتەپتەردە اس ءمازىرى مەن بالالاردىڭ تاعامداردى ناقتى تۇتىنۋ كورسەتكىشتەرى تۇراقتى تۇردە تالدانادى.
العاشقى مونيتورينگ ناتيجەسىندە كەيبىر تاعامداردىڭ جەلىنبەي قالۋ يندەكسى 50–70 پايىزعا دەيىن جەتكەن. بالالاردىڭ تالعامىن ەسكەرە وتىرىپ، مازىرگە وزگەرىستەر ەنگىزىلىپ، ەت جانە اقۋىز ونىمدەرىنىڭ ۇلەسى ارتتىرىلعاننان كەيىن بۇل كورسەتكىش 5–10 پايىزعا دەيىن تومەندەدى.
«مونيتورينگ بالالاردىڭ قانداي تاعامداردى جاقسى قابىلدايتىنىن، ال قاي تاعامداردىڭ ءىس جۇزىندە جەلىنبەي قالاتىنىن انىقتاۋعا مۇمكىندىك بەرەدى. ءمازىردى تۇزەتكەننەن كەيىن جەلىنبەي قالۋ يندەكسىن ايتارلىقتاي تومەندەتۋگە قول جەتكىزدىك»، – دەدى ساۋلە سادۆاكاسوۆا.
مەكتەپتەردى جاڭا وقۋ جىلىنا دايىنداۋدا جوندەۋ جۇمىستارى دا ماڭىزدى باعىتتاردىڭ ءبىرى بولىپ وتىر. قازىرگى ۋاقىتتا وبلىستاعى 16 نىساندا كۇردەلى جوندەۋ جۇمىستارى جۇرگىزىلۋدە. ونىڭ ەكەۋىندە جوندەۋ جۇمىستارى اياقتالعان، قالعان مەكتەپتەردى تامىز ايىنىڭ سوڭىنا دەيىن تولىق دايىندىققا كەلتىرۋ جوسپارلانعان.
ايتا كەتەيىك، سانيتاريالىق-ەپيدەميولوگيالىق باقىلاۋ تەك تەكسەرۋ جۇمىستارىمەن شەكتەلمەيدى. سوڭعى ۋاقىتتا ءبىلىم بەرۋ ۇيىمدارىنىڭ باسشىلارى مەن تاماق ونىمدەرىن جەتكىزۋشىلەرگە ارنالعان 50-گە جۋىق سەمينار وتكىزىلدى. سونىمەن قاتار 60-قا جۋىق تىكەلەي ەفير ۇيىمداستىرىلىپ، الەۋمەتتىك جەلىلەردە 70-كە جۋىق اقپاراتتىق ماتەريال جاريالاندى.
21 تامىزدا دەپارتامەنت بازاسىندا مەكتەپتەردىڭ جاڭا وقۋ جىلىنا دايىندىعىنا ارنالعان سەمينار وتەدى. جۇرگىزىلگەن مونيتورينگتىڭ قورىتىندىلارى وبلىس اكىمدىگىندە دە قارالادى.
وسىلايشا، وقۋ جىلى باستالعانعا دەيىن سانيتاريالىق-ەپيدەميولوگيالىق قىزمەتتىڭ نەگىزگى نازارى انىقتالعان بۇزۋشىلىقتاردى جويۋعا، جوندەۋ جۇمىستارىن اياقتاۋعا جانە وقۋشىلار ءۇشىن قاۋىپسىز ءارى سانيتاريالىق تالاپتارعا ساي جاعداي قالىپتاستىرۋعا باعىتتالادى.
