قازاقستاندىق بەس وقۋشى اقش-تاعى بەدەلدى جەكەمەنشىك مەكتەپتەردە ەكى جىل تەگىن ءبىلىم الۋعا مۇمكىندىك الدى. شاكىرتاقى وقۋ اقىسى مەن جاتاقحانادان باستاپ، تاماقتانۋ، مەديتسينالىق ساقتاندىرۋ جانە وقۋ قۇرالدارىنا دەيىنگى شىعىنداردى تولىق قامتيدى.
بىلتىر ءۇش قازاقستاندىق وقۋشى ارنايى گرانتقا يە بولسا، بيىل ولاردىڭ قاتارىنا تاعى بەس شاكىرت قوسىلدى. بۇل مۇمكىندىك «Oliver Grace Scholars Program» باعدارلاماسى اياسىندا ۇسىنىلىپ وتىر.
«Oliver Grace Scholars Program» گرانتىنىڭ كولەمى ءبىر وقۋشىعا ەكى جىلعا شامامەن 160 مىڭ اقش دوللارىن قۇرايدى. بۇل قازىرگى باعاممەن 80 ميلليون تەڭگەگە جۋىق.
شاكىرتاقى اياسىندا وقۋشىلاردىڭ وقۋ اقىسى، جاتاقحانادا تۇرۋى، تاماقتانۋى، مەديتسينالىق ساقتاندىرۋى جانە وقۋ قۇرالدارى تولەنەدى. سونىمەن قاتار ولاردىڭ اقش-قا جىلىنا ەكى رەت بارىپ-قايتۋ شىعىنى دا گرانتقا ەنگىزىلگەن.
بيىل ەراسىل، ارىستان جانە ءالىمجان ەسىمدى ءۇش قازاقستاندىق وقۋشى كوننەكتيكۋت شتاتىنداعى Salisbury School جەكەمەنشىك مەكتەبىنىڭ وليۆەر گرەيس اتىنداعى ەكى جىلدىق گرانتىنا يە بولدى.
الماتىلىق ءاسيا مەن ايبيكە دە بيىل اقش-تا ءبىلىم الۋ مۇمكىندىگىنە قول جەتكىزدى. ولار ۆاشينگتون ماڭىنداعى Episcopal High School مەكتەبىنە قازاق قىزدارىنا ارنالعان العاشقى ەكى گرانت بويىنشا قابىلدانعان.
Salisbury School – كوننەكتيكۋت شتاتىندا ورنالاسقان جەكەمەنشىك مەكتەپ. 1901 جىلى قۇرىلعان وقۋ ورنىندا 9-12 سىنىپ وقۋشىلارى ءبىلىم الادى.
مەكتەپ شامامەن 300 گەكتار اۋماقتا ورنالاسقان جانە 300-گە جۋىق وقۋشىعا ارنالعان. قازىر مۇندا اقش-تىڭ 40 شتاتىنان جانە الەمنىڭ 49 ەلىنەن كەلگەن وقۋشىلار ءبىلىم الىپ جاتىر. ولاردىڭ اراسىندا قازاقستاننان بارعان التى وقۋشى بار. بەسەۋى نازارباەۆ زياتكەرلىك مەكتەپتەرىندە ءبىلىم العان.
وقۋ ورنى وقۋشىلاردى اكادەميالىق بىلىممەن قاتار ينتەللەكتۋالدىق، فيزيكالىق جانە تۇلعالىق تۇرعىدان دامىتۋعا باعىتتالعان. سونداي-اق تۇلەكتەرىن اقش-تاعى جەتەكشى ۋنيۆەرسيتەتتەرگە تۇسۋگە دايىندايدى.
بىلتىر Salisbury School-دا ارنايى شاكىرتاقىعا العاش رەت قازاقستاندىق ءۇش وقۋشى – مۇقاعالي، ميراس جانە ايدار يە بولعان ەدى. ولار بيىل وقۋ ورنىن ءتامامداپ، اتتەستات الۋعا دايىندالىپ جاتىر.
2025/2026 وقۋ جىلىنداعى اكادەميالىق ناتيجەلەر بويىنشا مەكتەپتىڭ ەڭ ۇزدىك ءۇش وقۋشىسىنىڭ ەكەۋى قازاقستاننان بارعان شاكىرتتەر بولعان.
قازاقستاندىق وقۋشىلارعا ارنالعان بۇل مۇمكىندىك عابيت بەكاحمەتوۆ پەن امەريكالىق فيلانتروپ وليۆەر گرەيستىڭ بايلانىسى ارقىلى جۇزەگە اسىپ وتىر.
وقيعا وسىدان شامامەن 25 جىل بۇرىن باستالعان. قاراعاندىداعى قازاق-تۇرىك ليتسەيىندە وقىعان عابيت بەكاحمەتوۆ مەكتەپ بىتىرگەننەن كەيىن اقش-قا اتتانىپ، سولتۇستىك كارولينا شتاتىنداعى Duke University ۋنيۆەرسيتەتىنە وقۋعا تۇسكەن.
ول تمد ەلدەرىنەن شىققان دارىندى ستۋدەنتتەرگە ارنالعان وليۆەر گرەيس شاكىرتاقىسىنىڭ يەگەرى اتانىپ، ۋنيۆەرسيتەتتەگى وقۋىن ءساتتى اياقتاعان.
بۇگىندە عابيت بەكاحمەتوۆ – ءبىلىم سالاسىنىڭ مامانى، بىرنەشە كىتاپتىڭ اۆتورى ءارى زاماناۋي جەكەمەنشىك مەكتەپتەردىڭ نەگىزىن قالاۋشى. ونىڭ قاتارىندا ء«بىلىم كەمەلەرى: نزم، بيل، رفمم» جانە «بارساكەلمەس» كىتاپتارى بار.
عابيت بەكاحمەتوۆتىڭ ءبىلىم سالاسىنداعى جولىن باقىلاعان وليۆەر گرەيس قازاقستان جاستارىنا قولداۋ كورسەتۋدى جالعاستىرۋ تۋرالى شەشىم قابىلداعان.
وليۆەر گرەيس – Salisbury School-دى 1972 جىلى تامامداعان تۇلەك. 2025 جىلى ول عابيت بەكاحمەتوۆپەن بىرلەسىپ، قازاقستان وقۋشىلارىنا ارنالعان جاڭا شاكىرتاقى باعدارلاماسىن ىسكە قوسقان.
باعدارلاما بويىنشا جىل سايىن 200-300 ۇمىتكەردىڭ اراسىنان ءۇش وقۋشى ىرىكتەلەدى. كانديداتتاردىڭ اكادەميالىق ۇلگەرىمى، جەتىستىكتەرى جانە باسقا دا كورسەتكىشتەرى باعالانىپ، ولار ارنايى سۇحباتتان وتەدى.
العاشقى جىلى باعدارلاما تەك ۇلدارعا ارنالعان بولسا، بيىل قازاق قىزدارىنا دا مۇمكىندىك بەرىلدى. وسىلايشا، ۆاشينگتون ماڭىنداعى Episcopal High School مەكتەبىنە قازاقستاننان ەكى قىزعا ارنالعان گرانت ءبولىندى.
ءاسيا مەن ايبيكە ىرىكتەۋدەن ءوتىپ، اقش-تاعى جاڭا وقۋ جىلىن باستاپ كەتتى.
قازاقستاندىق وقۋشىلاردىڭ حالىقارالىق دەڭگەيدەگى بەدەلدى مەكتەپتەردە ءبىلىم الۋى ولاردىڭ شەتەلدىك جوعارى وقۋ ورىندارىنا دايىندالۋىنا دا مۇمكىندىك بەرەدى. باعدارلامانى ۇيىمداستىرۋشىلار الداعى ۋاقىتتا ءبىلىمدى ءارى تالانتتى قازاقستاندىق جاستاردى قولداۋدى جالعاستىرۋدى كوزدەپ وتىر.
الما سايلاۋقىزى
