اقش پرەزيدەنتى دونالد ترامپ يراندى سەيسەنبىنىڭ ءبىر تۇنىندە «جويىپ تاستاۋعا» بولاتىنىن مالىمدەپ، قورقىتتى، دەپ حابارلايدى “ادىرنا” ۇلتتىق پورتالى.
اق ءۇي باسشىسىنىڭ ايتۋىنشا، امەريكالىق قارۋلى كۇشتەر سوڭعى اپتالاردا يران اۋماعىنا اۋقىمدى اۋە شابۋىلدارىن جۇرگىزگەن.
ونىڭ سوزىنشە، سوڭعى 37 كۇندە 10 مىڭنان استام اۋە شابۋىلى جاسالىپ، 13 مىڭنان استام نىساناعا سوققى بەرىلگەن.
پرەزيدەنت ترامپ يرانمەن قاقتىعىس جاعدايىندا ۆاشينگتونعا قولداۋ كورسەتپەگەن وداقتاس ەلدەردى سىناپ، قولداۋ بىلدىرگەندەردى ماقتادى.
«جاپونيا بىزگە كومەكتەسپەدى، اۋستراليا كومەكتەسپەدى، وڭتۇستىك كورەيا كومەكتەسپەدى. كەيىن ناتو-عا جۇگىنەسىزدەر — ولار دا بىزگە كومەكتەسپەدى. ساۋد ارابياسى كەرەمەت بولدى، قاتار كەرەمەت بولدى، ءباا، باحرەين، كۋۆەيت — بارلىعى دا قولداۋ كورسەتتى»، — دەدى ول اق ۇيدەگى ءباسپاسوز ءماسليحاتىندا.
پرەزيدەنت اقش-تىڭ اتالعان ەلدەرگە قاۋىپسىزدىك تۇرعىسىنان قولداۋ كورسەتىپ وتىرعانىن دا اتاپ ءوتتى.
«جاپونيادا ولاردى سولتۇستىك كورەيادان قورعاپ وتىرعان 50 مىڭ اسكەري قىزمەتكەرىمىز بار. وڭتۇستىك كورەيادا كيم چەن ىننان قورعاپ وتىرعان 45 مىڭ اسكەرىمىز بار»، — دەدى ترامپ.
