اقش پرەزيدەنتى دونالد ترامپتىڭ ۆەنەسۋەلا اۋماعىندا جۇرگىزگەن وپەراتسياسى ەل ىشىندە ساياسي داۋعا ۇلاستى. نيۋ-يورك قالاسىنىڭ مەرى جانە دەموكراتيالىق پارتيا وكىلدەرى اق ءۇيدىڭ ارەكەتىن قاتاڭ سىنعا الىپ، ونى حالىقارالىق قۇقىقتى بۇزۋ دەپ باعالادى.
نيۋ-يورك مەرى زوحران مامداني بۇل وپەراتسيانى «ەگەمەن مەملەكەتكە قارسى بىرجاقتى شابۋىل» دەپ اتاپ، ونى سوعىس اكتىسى رەتىندە سيپاتتادى. ونىڭ ايتۋىنشا، مۇنداي ارەكەتتەر تەك شەتەلدەگى جاعدايعا عانا ەمەس، تىكەلەي نيۋ-يورك تۇرعىندارىنا دا اسەر ەتەدى. بۇعان دەيىن اقش پرەزيدەنتى دونالد ترامپ ۆەنەسۋەلا پرەزيدەنتى نيكولاس مادۋرونىڭ نيۋ-يورككە جەتكىزىلەتىنىن مالىمدەگەن بولاتىن.
دەموكراتيالىق پارتيادان سايلانعان بىرقاتار سەناتورلار مەن كونگرەسسمەندەر دە اق ءۇيدىڭ شەشىمىنە قارسى شىقتى. سەناتور ەندي كيم مەملەكەتتىك حاتشى ماركو رۋبيو مەن قورعانىس ءمينيسترى پيت حەگسەتتىڭ بۇعان دەيىن ۆەنەسۋەلادا بيلىك اۋىستىرۋ جوسپارى جوق ەكەنىن ايتقانىن ەسكە سالدى. ونىڭ پىكىرىنشە، قازىرگى جاعداي بۇل مالىمدەمەلەردىڭ شىندىققا جاناسپايتىنىن كورسەتىپ وتىر.
سەناتور رۋبەن گالەگو اق ءۇيدىڭ ارەكەتىن «ومىرىمدەگى ەكىنشى نەگىزسىز سوعىس» دەپ اتادى. ول اقش-تىڭ قىسقا ۋاقىت ىشىندە «الەمدىك پوليتسەيدەن الەمدىك بۇزاقىعا» اينالعانىن مالىمدەدى. ال كونگرەسسمەن دجيم ماكگوۆەرن بۇل وپەراتسيا كونگرەستىڭ رۇقساتىنسىز جانە امەريكالىقتاردىڭ باسىم بولىگى سوعىسقا قارسى بولىپ وتىرعان جاعدايدا جاسالعانىن ايتىپ، ونى زاڭسىز دەپ باعالادى.
ءوز كەزەگىندە دونالد ترامپ بۇل ايىپتاۋلاردى جوققا شىعارىپ، وپەراتسيا تۋرالى كونگرەستى الدىن الا حاباردار ەتپەۋىنىڭ سەبەبىن اقپاراتتىڭ تارالىپ كەتۋ قاۋپىمەن ءتۇسىندىردى. ال ماركو رۋبيو كونگرەسس مۇشەلەرىنە وپەراتسيا باستالعاننان كەيىن اقپارات بەرىلگەنىن مالىمدەدى.
اقش-تاعى بۇل جاعداي ەلدىڭ سىرتقى ساياساتىنا قاتىستى پىكىرتالاستاردى كۇشەيتىپ، بيلىك تارماقتارى اراسىنداعى كەلىسپەۋشىلىكتى ايقىن كورسەتتى.
