اقش پرەزيدەنتى دونالد ترامپ يرانعا جاسالىپ جاتقان شابۋىلدى 2 اپتاعا توقتاتۋعا كەلىستى، دەپ حابارلايدى «ادىرنا» ءتىلشىسى.
شارت بويىنشا يران ورمۋز بۇعازى ارقىلى كەمەلەردىڭ كەدەرگىسىز ءوتۋىن قامتاماسىز ەتۋى ءتيىس.
«يرانعا قارسى شابۋىلداردى ەكى اپتا مەرزىمگە توقتاتۋعا كەلىسەمىن»، — دەپ جازدى ترامپ الەۋمەتتىك جەلىدە.
اق ءۇي باسشىسى يران ۇسىنعان ون تارماقتان تۇراتىن جوسپاردىڭ كەلىسسوزدەر ءۇشىن نەگىز رەتىندە قاراستىرىلىپ جاتقانىن مالىمدەدى. ايتۋىنشا، بۇل ەكى اپتا تۇپكىلىكتى كەلىسىمگە كەلۋ ءۇشىن قاجەت.
ەگەر يران بەيبىت ۋاقىتتا الەمدىك مۇناي مەن سۇيىتىلعان تابيعي گازدىڭ شامامەن 20%-ى وتەتىن ورمۋز بۇعازىن اشۋدان باس تارتسا، ترامپ يراننىڭ ازاماتتىق ينفراقۇرىلىمىن، سونىڭ ىشىندە كوپىرلەر مەن ەلەكتر ستانتسيالارىن بومبالاپ، ءتىپتى «يران وركەنيەتىن جوياتىنىن» جەتكىزدى. بۇل ۋلتيماتۋمنىڭ مەرزىمى گرينۆيچ ۋاقىتى بويىنشا 8 ءساۋىر كۇنى ساعات 01:00-دە اياقتالادى.
سوڭعى ساعاتتاردا يران مەن اقش اراسىندا دەلدال بولعان پاكىستان ەكى تاراپقا بەيبىت ۇسىنىس جەتكىزگەنىن جاريا تۇردە مالىمدەدى. وندا ۆاشينگتوننان بومبالاۋدى ەكى اپتاعا توقتاتۋ، ال تەگەراننان بۇعازدى اشۋ تالاپ ەتىلگەن. ءوز جازباسىندا ترامپ پاكىستان پرەمەر-ءمينيسترى شەحباز شاريفپەن جانە فەلدمارشال اسيم مۋنيرمەن سويلەسكەنىن ايتىپ، ولاردىڭ « يرانعا باعىتتالعان جويقىن كۇشتى ۇستاپ تۇرۋدى» سۇراعانىن جەتكىزدى.
«امەريكا قۇراما شتاتتارى مەن يران اراسىنداعى بۇرىنعى داۋلى ماسەلەلەردىڭ باسىم بولىگى كەلىسىلدى، بىراق ەكى اپتالىق مەرزىم كەلىسىمدى تۇپكىلىكتى پىسىقتاپ، ونى ىسكە اسىرۋعا مۇمكىندىك بەرەدى»، — دەپ جازدى پرەزيدەنت.
ترامپتىڭ مالىمدەمەسىنەن شامامەن ءبىر ساعات وتكەن سوڭ يراننىڭ سىرتقى ىستەر ءمينيسترى ابباس اراگچي، سونداي-اق ۇلتتىق قاۋىپسىزدىك جوعارى كەڭەسى تەگەراننىڭ ەكى اپتالىق اتىستى توقتاتۋعا جانە ورمۋز بۇعازى ارقىلى كەمە قاتىناسىن قايتا باستاۋعا كەلىسەتىنىن جاريالادى. اراگچي كەمە قاتىناسى «يران قارۋلى كۇشتەرىمەن ۇيلەستىرۋ ارقىلى جانە تەحنيكالىق شەكتەۋلەردى ەسكەرە وتىرىپ» جۇزەگە اساتىنىن اتاپ ءوتتى.
