اقش پرەزيدەنتى دونالد ترامپ ايدىڭ امەريكا قۇراما شتاتتارىنا تيەسىلى ەكەنىن مەڭزەدى، دەپ حابارلايدى «ادىرنا» ءتىلشىسى.
ول Truth Social الەۋمەتتىك جەلىسىندە ايدىڭ سۋرەتىن جاريالاپ، وعان اقش تۋىمەن بىرگە «اي – بىزدىكى» (The Moon is ours) دەگەن جازۋ ورنالاستىرعان.
وتكەن جىلى اق ءۇي باسشىسى اقش-تىڭ 2028 جىلعا قاراي ادامدى قايتادان ايعا جىبەرۋدى جوسپارلاپ وتىرعانىن ايتقان بولاتىن. ونىڭ سوزىنشە، بۇل قادام عارىشتاعى امەريكالىق كوشباسشىلىقتى نىعايتۋعا، اي ەكونوميكاسىنىڭ نەگىزىن قالاۋعا جانە مارسقا ۇشۋعا دايىندىق جاساۋعا مۇمكىندىك بەرەدى.
سونداي-اق ول 2030 جىلعا قاراي اقش ايدا تۇراقتى بازا قۇرىپ، يادرولىق رەاكتور ورنالاستىرۋدى كوزدەپ وتىرعانىن جەتكىزدى.
ەسكە سالايىق، ايعا العاش قادام باسقان ادام – امەريكالىق استروناۆت نيل ارمسترونگ. ول 1969 جىلعى 20 شىلدەدە Apollo 11 ميسسياسى اياسىندا اي بەتىنە قونعان ەدى. ال ادامداردىڭ ايعا سوڭعى رەت ساپارى 1972 جىلدىڭ جەلتوقسانىندا Apollo 17 ميسسياسى كەزىندە جۇزەگە اسقان. سودان بەرى ادامزات اي بەتىنە قايتا قونعان جوق.
