قازاقستان، قىرعىزستان، تاجىكستان، تۇرىكمەنستان، وزبەكستان جانە اقش ۇكىمەتتەرى مالىمدەمەگە قول قويدى، دەپ حابارلايدى “ادىرنا” ۇلتتىق پورتالى.
مادەني مۇرا تۋرالى قۇجات C5+1 ديپلوماتيالىق پلاتفورماسىنىڭ قۇرىلعانىنا ون جىل تولۋىنا وراي قابىلداندى.
مالىمدەمە تاراپتاردىڭ مادەني مۇرانى قورعاۋ، ساقتاۋ جانە دامىتۋ باعىتىنداعى ىنتىماقتاستىعىن تەرەڭدەتۋدى كوزدەيدى.
C5+1 ەلدەرى ءار مەملەكەتتىڭ بىرەگەي مادەني مۇراسىن جانە ولاردىڭ ادامزات وركەنيەتىنە قوسقان ۇلەسىن مويىنداي وتىرىپ، مادەني بايلانىستاردى كەڭەيتۋگە، مادەني قۇندىلىقتاردىڭ زاڭسىز اينالىمىنىڭ الدىن الۋعا جانە ۇلتتىق مۇراجايلار اراسىنداعى سەرىكتەستىكتى ارتتىرۋعا كەلىستى.
قۇجاتتا مادەني مۇرانى ساقتاۋ جانە قورعاۋ سالاسىندا اقپارات الماسۋدى كۇشەيتۋ مەن قۇندىلىقتاردىڭ زاڭسىز ساۋداسىنا جول بەرمەۋ ءۇشىن وڭىرلىك جەلىلەر قۇرۋ تۋرالى ايتىلعان.
سونداي-اق، مادەني مۇرانى تۋريزم جانە كرەاتيۆتى يندۋستريامەن ۇشتاستىرۋ، كونسەرۆاتسيا، تسيفرلاندىرۋ، رەستاۆراتسيا جانە ارحەولوگيا سالالارىندا تاجىريبە الماسۋ دا كورسەتىلگەن.
سونىمەن قاتار، تاراپتار ءار ەلدىڭ باي مادەني مۇراسىن دارىپتەيتىن فەستيۆالدەر مەن مادەني ءىس-شارالاردى بىرلەسە وتكىزۋگە نيەتتى ەكەنىن مالىمدەدى.
