2027 جىلدىڭ 1 قاڭتارىنان باستاپ قازاقستاندا مىندەتتى زەينەتاقى جارنالارىنىڭ ساقتالۋىنا قاتىستى مەملەكەتتىك كەپىلدىك بەرۋ تەتىگى وزگەرەدى، دەپ حابارلايدى "ادىرنا" ءتىلشىسى.
بۇل تۋرالى بىرىڭعاي جيناقتاۋشى زەينەتاقى قورى اقپارات تاراتتى. قولدانىستاعى تارتىپكە سايكەس، مەملەكەت مىندەتتى زەينەتاقى جارنالارىنىڭ ساقتالۋىنا ينفلياتسيا دەڭگەيىن ەسكەرە وتىرىپ كەپىلدىك بەرەدى. ەگەر ينۆەستيتسيالىق تابىس ينفلياتسيادان تومەن بولسا، ايىرماشىلىق مەملەكەت تاراپىنان وتەلەدى.
ال 2027 جىلدىڭ 1 قاڭتارىنان باستاپ بۇل تەتىك كۇشىن جويادى. ەندى مەملەكەت ازاماتتىڭ زەينەتاقى شوتىنا ناقتى اۋدارىلعان مىندەتتى زەينەتاقى جارنالارىنىڭ ساقتالۋىنا عانا كەپىلدىك بەرەدى. ينفلياتسيا سالدارىنان قاراجاتتىڭ قۇنسىزدانۋى ەندى وتەلمەيدى.
بجزق مالىمەتىنشە، وزگەرىستەر ازاماتتارعا زەينەتاقى جيناقتارىن باسقارۋدا كوبىرەك مۇمكىندىك بەرۋ ماقساتىندا ەنگىزىلىپ وتىر. 2026 جىلدىڭ قىركۇيەكتەن باستاپ سالىمشىلار مىندەتتى زەينەتاقى جيناقتارىنىڭ 100 پايىزىنا دەيىن جەكە باسقارۋشى ينۆەستيتسيالىق كومپانيالارعا سەنىمگەرلىك باسقارۋعا بەرە الادى. قازىرگى تاڭدا بۇل كورسەتكىش 50 پايىزدان اسپايدى. ازاماتتار زەينەتاقى قاراجاتىن ۇلتتىق بانكتىڭ باسقارۋىندا قالدىرۋعا نەمەسە ونى ءبىر نەمەسە بىرنەشە جەكە باسقارۋشى كومپانياعا سەنىپ تاپسىرۋعا مۇمكىندىك الادى. ءار كومپانيانىڭ ينۆەستيتسيالىق ستراتەگياسى، تاۋەكەل دەڭگەيى جانە كۇتىلەتىن كىرىستىلىگى ءارتۇرلى بولادى.
سونىمەن قاتار مەملەكەت جەكە باسقارۋشى كومپانيالاردىڭ قىزمەتىن باقىلاۋدى جالعاستىرادى. ەگەر كومپانيانىڭ ينۆەستيتسيالىق كىرىستىلىگى بەلگىلەنگەن ەڭ تومەنگى دەڭگەيدەن تومەن بولسا، ايىرماشىلىقتى كومپانيا ءوز قاراجاتى ەسەبىنەن وتەۋگە مىندەتتى.
بجزق زەينەتاقى شوتتارىن جۇرگىزۋدى جالعاستىرادى. سالىمشىلار ءوز جيناقتارىنىڭ كولەمى مەن باسقارۋشى كومپانيالاردىڭ قىزمەت ناتيجەلەرىن قوردىڭ ارنايى اقپاراتتىق سەرۆيسى ارقىلى باقىلاي الادى.
