يسپانيا مەن قازاقستاندا «La tregua» ء(«بىتىم») اتتى قازاقستاندىق-يسپاندىق تاريحي دراما كورەرمەنگە جول تارتادى. فيلم ەكى يسپاندىق اسكەري تۇتقىننىڭ كەڭەس وداعىنىڭ گۋلاگ جۇيەسىندەگى ءومىرى تۋرالى شىنايى وقيعاعا نەگىزدەلگەن، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
فيلم 10 قازان كۇنى يسپانيادا العاش رەت كورسەتىلسە، ەلىمىزدە 30 قازاندا پروكاتقا شىعادى.
كارتينادا ەكىنشى دۇنيەجۇزىلىك سوعىس جىلدارى قاراعاندى وبلىسىنداعى سپاسسك-99 لاگەرىندە بولعان يسپان اسكەري تۇتقىندارىنىڭ تاعدىرى بەينەلەنەدى. بۇل ادامدار يسپانياداعى ازاماتتىق سوعىستان كەيىن كسرو اۋماعىنا تاپ بولىپ، ءماجبۇرلى ەڭبەك لاگەرلەرىنە جىبەرىلگەن ەدى.
ءفيلمنىڭ رەجيسسەرى — «La casa de papel» («قاعاز ءۇي») سەريالىنىڭ بىرنەشە ءبولىمىن تۇسىرگەن اتاقتى يسپان رەجيسسەرى ميگەل انحەل ۆيۆاس. ءتۇسىرىلىم يسپانيانىڭ باسك ەلى اۆتونومدى قاۋىمداستىعىنا قاراستى الاۆا پروۆينتسياسىندا ءوتتى. وندا كەڭەستىك لاگەردىڭ كورىنىسىن شىنايى تۇردە كورسەتۋ ءۇشىن ارنايى دەكوراتسيالار تۇرعىزىلىپ، باراكتار مەن تىكەنەك سىمدار ورناتىلدى. قاتتى قىستىڭ اتموسفەراسىن جەتكىزۋ ءۇشىن ءتۇسىرىلىم توبى بىرنەشە توننا جاساندى قار قولدانعان.
ءفيلمنىڭ الەمدىك تۇساۋكەسەرى سان-سەباستيان كينوفەستيۆالىندە ءوتتى. كورسەتىلىم كەزىندە كورەرمەندەر ۇزاق قول شاپالاقتاپ، اسەرلى كورىنىستەردەن كوزىنە جاس العان. سىنشىلار دا كارتينانى جوعارى باعالاپ، ونى قازاقستاندىق كينەماتوگرافيا ءۇشىن ماڭىزدى جەتىستىك دەپ اتادى.
«بۇل جوبا – تەك ءبىزدىڭ پروديۋسەرلىك توپ ءۇشىن ەمەس، بۇكىل قازاقستان ءۇشىن ۇلكەن جەتىستىك دەپ سانايمىز»، – دەدى ءفيلمنىڭ اتقارۋشى پروديۋسەرى داير كاراكەەۆ.
ۇزاقتىعى 150 مينۋت بولاتىن فيلم يسپان جانە ورىس تىلدەرىندە تۇسىرىلگەن. ول يسپاندىق Plano a Plano, قازاقستاندىق Spassks99 جانە Amanat Capital كومپانيالارىنىڭ بىرلەسكەن جوباسى. جوبانى Netflix پەن RTVE قولداعان.
