فوتو: ERR
شۆەيتساريادا وتكەن يران مەن اقش اراسىنداعى جوعارى دەڭگەيدەگى كەلىسسوزدەردىڭ العاشقى راۋندى اياقتالدى. يران بيلىگىنىڭ مالىمدەۋىنشە، تاراپتار ليۆانداعى اسكەري قاقتىعىستى توقتاتۋ باعىتىندا ايتارلىقتاي ىلگەرىلەۋگە قول جەتكىزگەن، دەپ حابارلايدى “ادىرنا” ۇلتتىق پورتالى Euronews-كە سىلتەپ.
اقپاراتقا سايكەس، كەلىسسوزدەر ناتيجەسىندە يران مەن اقش ليۆانداعى اتىستى توقتاتۋ رەجيمىنىڭ ساقتالۋىن باقىلاۋعا ارنالعان ارنايى ۇيلەستىرۋ ورتالىعىن قۇرۋعا كەلىستى. بۇل قۇرىلىمنىڭ جۇمىسىنا ليۆان ۇكىمەتى دە قاتىسادى. دەلدالدىق مىندەتتى اتقارعان پاكىستان مەن كاتار وكىلدەرى كەزدەسۋدىڭ «وڭ جانە سىندارلى جاعدايدا» وتكەنىن حابارلادى.
تاراپتار الداعى اپتالاردا تەحنيكالىق كونسۋلتاتسيالار وتكىزىپ، ىقتيمال بەيبىت كەلىسىمنىڭ ناقتى تەتىكتەرىن ازىرلەۋدى جوسپارلاپ وتىر. ديپلوماتيالىق پروتسەسس 60 كۇنگە ەسەپتەلگەن جانە ونىڭ باستى ماقساتى – يرانعا قارسى اسكەري ءىس-قيمىلداردى تولىق توقتاتۋ جونىندەگى كەلىسىمگە قول جەتكىزۋ.
دەگەنمەن كەلىسسوزدەردەگى نەگىزگى تۇيتكىل ليۆان ماسەلەسى بولىپ قالىپ وتىر. يران ليۆانداعى اسكەري ارەكەتتەردى توقتاتۋ تۋرالى تارماقتىڭ كەلىسىمگە ەنگىزىلۋىن تالاپ ەتسە، يزرايل ءوز اۋماعىنا قاۋىپ توندىرەتىن قارۋلى توپتارعا قارسى وپەراتسيالار جۇرگىزۋ قۇقىعىن ساقتاپ قالۋدى كوزدەيدى.
كەلىسسوزدەر بارىسىندا ورمۋز بۇعازى ماسەلەسى دە كوتەرىلدى. يراننىڭ بۇعازداعى جاعدايعا قاتىستى مالىمدەمەلەرىنەن كەيىن تاراپتار حالىقارالىق تەڭىز قاتىناسىنىڭ قاۋىپسىزدىگىن قامتاماسىز ەتۋ جولدارىن تالقىلاعان. اقش بۇعاز ارقىلى كەمە قوزعالىسى جالعاسىپ جاتقانىن مالىمدەدى.
سونىمەن قاتار يادرولىق باعدارلاماعا قاتىستى ماسەلەلەر بويىنشا دا قىزۋ پىكىر الماسۋ وتكەن. ساراپشىلاردىڭ پىكىرىنشە، الداعى تەحنيكالىق كونسۋلتاتسيالار كەلىسسوزدەردىڭ تاعدىرىن ايقىندايتىن ماڭىزدى كەزەڭ بولماق.
ايتا كەتەيىك، كەلىسسوزدەردىڭ باستالۋى الدىندا اقش پرەزيدەنتى دونالد ترامپتىڭ يرانعا قاتىستى قاتاڭ مالىمدەمەلەرى جاعدايدى كۇردەلەندىرگەن ەدى. سوعان قاراماستان تاراپتار ديالوگتى جالعاستىرۋعا ۋاعدالاسىپ، قاقتىعىستى ديپلوماتيالىق جولمەن رەتتەۋ مۇمكىندىگىن ساقتاپ قالدى.
