ليتۆا بيلىگى قىرعىزستان، وزبەكستان جانە قازاقستانداعى، سونداي-اق بوسنيا جانە گەرتسەگوۆيناداعى ۆيزالىق ورتالىقتاردى جابۋ تۋرالى شەشىم قابىلدادى. بۇل تۋرالى 23 قىركۇيەكتە ليتۆانىڭ ىشكى ىستەر ءمينيسترى مارتيناس كاتەليناس حابارلادى، دەپ جازادى “ادىرنا”.
ءمينيستردىڭ ايتۋىنشا، جابىلاتىن ورتالىقتار سىرتقى قىزمەت جەتكىزۋشى كومپانيالاردىڭ بولىمشەلەرى رەتىندە جۇمىس ىستەگەن. ولار شەتەل ازاماتتارى مەن ليتۆا مەملەكەتتىك ورگاندارى اراسىندا دەلدالدىق قىزمەت كورسەتىپ، ەلدە تۇرۋعا رۇقسات الۋ ءۇشىن قۇجات قابىلداعان جانە كوشى-قون راسىمدەرىن باستاعان.
كاتەليناستىڭ مالىمدەۋىنشە، ۆيزالىق ورتالىقتاردى جابۋ تۋرالى شەشىم قاۋىپسىزدىك تاۋەكەلدەرى مەن تەرروريزم قاۋپىن باعالاۋ ناتيجەسىندە قابىلدانعان.
ليتۆا ىشكى ىستەر ءمينيسترى مەملەكەتتىك قاۋىپسىزدىك دەپارتامەنتى ورتالىق ازيادان كەلگەن كەيبىر ادامدار اراسىندا راديكالدى كوزقاراستار مەن تەرروريزممەن بايلانىس بولۋى مۇمكىن ەكەنىن انىقتاپ جاتقانىن ايتتى. ونىڭ سوزىنشە، بيلىك ىقتيمال قاۋىپتىڭ ناقتى وقيعاعا اينالۋىن كۇتپەۋى كەرەك.
ول سونداي-اق سىرتقى قىزمەت جەتكىزۋشىلەرىنىڭ جاڭا بولىمشەلەرىن اشۋ جوسپارلانبايتىنىن ايتتى.
قازىرگى ۋاقىتتا ەلدە سىرتقى قىزمەت جەتكىزۋشىلەرىنىڭ 31 ورتالىعى جۇمىس ىستەيدى. ءتورت ورتالىق جابىلعاننان كەيىن ولاردىڭ سانى 27-گە دەيىن قىسقارادى. جابۋ ءراسىمىن 2026 جىلعى 1 قاراشاعا دەيىن اياقتاۋ جوسپارلانعان.
كاتەليناس ۆيزالىق ورتالىقتاردىڭ جابىلۋى ليتۆاعا بارۋعا ارنالعان ۆيزالاردى بەرۋ پروتسەسى توقتايدى دەگەندى بىلدىرمەيتىنىن اتاپ ءوتتى.
مينيستر شەنگەن ۆيزالارىن بەرۋ توقتامايتىنىن اتاپ ءوتتى.
«ەشتەڭە دە اياقسىز قالمايدى. بۇعان دەيىن دە ادامدار ۆيزانىڭ ءارتۇرلى تۇرلەرىن، سونىڭ ىشىندە C ساناتىنداعى شەنگەن ۆيزاسىن الۋ ءۇشىن ەلشىلىكتەر مەن كونسۋلدىق مەكەمەلەرگە جۇگىنە الاتىن. بۇدان بىلاي دا بۇل مۇمكىن بولادى. ەلشىلىكتەر مەن كونسۋلدىقتار جابىلمايدى»، – دەدى مينيستر 24 قىركۇيەكتە ليتۆا پارلامەنتىندە.
ۆيزالىق ورتالىقتاردى جابۋ تۋرالى شەشىم ليتۆانىڭ كوشى-قون ساياساتىن قاتاڭداتىپ جاتقان كەزەڭدە قابىلدانىپ وتىر. 2026 جىلدىڭ قىركۇيەك ايىنىڭ باسىندا ليتۆاعا جۇمىس ىستەۋ ءۇشىن كەلەتىن شەتەل ازاماتتارىنا ارنالعان وسى جىلعا بەلگىلەنگەن 24,7 مىڭ ادامدىق كۆوتا تولىق پايدالانىلىپ قويدى. كۆوتا اياقتالعاننان كەيىن جۇمىسقا ورنالاسۋ نەگىزىندە ۋاقىتشا تۇرۋعا رۇقسات تەك زاڭدا قاراستىرىلعان جاعدايلاردا عانا بەرىلەدى.
كوشى-قون دەپارتامەنتىنىڭ مالىمەتىنشە، 2026 جىلعى 1 قىركۇيەكتەگى جاعداي بويىنشا ليتۆادا شامامەن 227 مىڭ شەتەل ازاماتىنىڭ قولدانىستاعى تۇرۋعا رۇقساتى بولعان. ولاردىڭ 80 مىڭى – ۋكراينا ازاماتتارى، 48 مىڭعا جۋىعى – بەلارۋس ازاماتتارى، 13 مىڭى – رەسەي ازاماتتارى، شامامەن 13 مىڭى – وزبەكستان، 9,4 مىڭى ء–ۇندىستان، 7,4 مىڭى – تاجىكستان ازاماتتارى.
2025 جىلى ليتۆا بيلىگى دۋشانبەدەگى ۆيزالىق ورتالىقتى جاباتىنىن دا جاريالاعان بولاتىن. «ازاتتىق-ازيا» مالىمەتىنشە، ورتالىق ەكى جىل جۇمىس ىستەگەن ۋاقىت ىشىندە شامامەن 6,5 مىڭ ادام ليتۆادا تۇرۋعا رۇقسات الۋ ءۇشىن قۇجاتتارىن راسىمدەگەن. ولاردىڭ باسىم بولىگى جۇرگىزۋشىلەر مەن قۇرىلىسشىلار بولعان. الايدا ولاردىڭ كوپشىلىگى ليتۆانى تەك ترانزيتتىك ەل رەتىندە پايدالانىپ، ءىس جۇزىندە ەۋروپالىق وداقتىڭ باسقا مەملەكەتتەرىندە جۇمىس ىستەگەن.
