كەلەسى جىلى ۇقشۇ جاتتىعۋلارى كەزەڭىندە ورتالىق ازيا وڭىرىنە باسا نازار اۋدارىلادى. بۇل تۋرالى بريفينگتە ۇجىمدىق قاۋىپسىزدىك تۋرالى شارت ۇيىمىنىڭ بىرىككەن شتابىنىڭ باستىعى اناتولي سيدوروۆ مالىمدەدى، دەپ حابارلايدى «ادىرنا» ۇلتتىق پورتالى.
ونىڭ ايتۋىنشا، دايىندىق شارالارى قىرعىزستاندا، قازاقستاندا جانە تاجىكستاندا وتەدى.
«2024 جىلعا ارنالعان وقۋ-جاتتىعۋ جوسپارىندا ورتالىق ازيا ۇجىمدىق قاۋىپسىزدىك ايماعىنا باسا نازار اۋدارىلدى. اتاپ ايتقاندا، قىرعىزستاندا بىزدە ۇقشۇ-نىڭ ۇجىمدىق جەدەل ارەكەت ەتۋ كۇشتەرىمەن، قازاقستاندا — بىتىمگەرشىلىك كۇشتەرىمەن، سونداي-اق تاجىكستاندا ءوڭىردى جەدەل ورىستەتۋ ۇجىمدىق كۇشتەرىمەن وقۋ-جاتتىعۋلار جوسپارلانعان»، - دەدى اناتولي سيدوروۆ.
سونداي-اق ول وقۋ-جاتتىعۋلاردى وتكىزۋ ۋاقىتى مەن دايىندىق الاڭدارى تۋرالى ايتۋعا ءالى ەرتە ەكەنىن، كەڭەستەر اعىمداعى جىلدىڭ جەلتوقسان ايىندا باستالاتىنىن دا اتاپ ءوتتى.
«ادىرنا» ۇلتتىق پورتالى
