8 ءساۋىر كۇنى يزرايل ليۆاننىڭ وڭتۇستىگىنە جاپپاي سوققى جاسادى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
ليۆان پرەمەر-ءمينيسترى ناۆاف سالام يزرايل شابۋىلدارى حالىق تىعىز قونىستانعان تۇرعىن اۋدانداردى قامتىپ، بىرنەشە وڭىردە، اسىرەسە بەيرۋتتا، قارۋسىز بەيبىت تۇرعىنداردىڭ ءومىرىن قيعانىن مالىمدەدى. ەلدىڭ دەنساۋلىق ساقتاۋ مينيسترلىگى كەشكە قاراي اتقىلاۋلار سالدارىنان كەمىندە 112 ادام قازا تاۋىپ، 837 ادام جارالانعانىن مالىمدەدى.
سوققىلار اقش پەن يران اراسىنداعى ءبىتىم جاريالانعاننان كەيىن بىرنەشە ساعات وتكەن سوڭ جاسالدى. يزرايل «حەزبوللا» پوزيتسيالارىن اتقىلاپ، ليۆاننىڭ وڭتۇستىگىندەگى تۇرعىندارعا ەۆاكۋاتسيالانۋ قاجەتتىگىن ەسكەرتىپ جاتىر. يزرايل اقش پرەزيدەنتى دونالد ترامپتىڭ يرانعا سوققىلاردى ەكى اپتاعا توقتاتۋ شەشىمىن قولدايتىنىن مالىمدەگەن ەدى.
ال يزرايل پرەمەر-ءمينيسترى بينيامين نەتانياحۋ تساحال ليۆانعا سوققىلاردى جالعاستىراتىنىن ايتىپ وتىر، ويتكەنى ونىڭ پىكىرىنشە، يرانمەن سوعىستاعى ءبىتىم ليۆانعا قولدانىلمايدى.
بۇل پاكىستاننىڭ مالىمدەمەسىنە قايشى كەلەدى. يرانمەن بىتىمگە كەلۋدە دەلدال بولعان پاكىستان ليۆان باعىتىنداعى ارەكەتتەر دە توقتاتىلاتىنىن ايتقان. قاقتىعىستا دەلدال بولعان پاكىستان پرەمەر-ءمينيسترى شاحباز شاريف يران مەن اقش اراسىنداعى ەكى اپتالىق ءبىتىم «بارلىق جەردە، سونىڭ ىشىندە ليۆاندا دا» كۇشىندە ەكەنىن مالىمدەگەن.
