اقش-تىڭ ارتەميكس II ميسسياسى ءساتتى اياقتالىپ، وريون عارىش كەمەسى ەكيپاجىمەن بىرگە جەرگە ورالدى، دەپ حابارلايدى "ادىرنا" ۇلتتىق پورتالى.
عارىشكەرلەر مىنگەن كاپسۋلا تىنىق مۇحيتىنىڭ سان-ديەگو جاعالاۋىنا جاقىن جەرگە ءساتتى قونعان. بۇل — سوڭعى 50 جىلدان استام ۋاقىتتاعى ايعا جاسالعان العاشقى پيلوتتىق ساپار.
عارىشكەرلەردىڭ جەرگە ورالۋى ميسسيانىڭ ەڭ كۇردەلى كەزەڭدەرىنىڭ ءبىرى بولدى. كەمە اتموسفەراعا شامامەن 40 مىڭ كم/ساع جىلدامدىقپەن كىرىپ، قاتتى قىزعان. باق دەرەگىنشە، وسى ساتتە اۋا ۇيكەلىسىنەن پلازما قاباتى پايدا بولىپ، شامامەن التى مينۋتقا بايلانىس ءۇزىلدى.
DW دەرەگىنشە، اتموسفەراعا كىرەر الدىندا قىزمەتتىك مودۋل اجىراتىلىپ، كاپسۋلا جىلۋ قالقانىمەن العا باعىتتالدى. دۇرىس بۇرىشتى ساقتاۋ ەكيپاجدىڭ قاۋىپسىزدىگى ءۇشىن شەشۋشى ءرول اتقارقان. بۇدان كەيىن عارىش كەمەسى بىرتىندەپ باياۋلاپ، الدىمەن تەجەگىش پاراشيۋتتەر اشىلعان. كەيىن ءۇش نەگىزگى پاراشيۋت ىسكە قوسىلىپ، جىلدامدىق شامامەن 30 كم/ساع دەيىن تومەندەدى.
كاپسۋلا مەجەگە قونعاننان كەيىن قۇتقارۋ توپتارى دەرەۋ ىسكە كىرىستى. عارىشكەرلەردى ارنايى قايىقتارمەن قورشالىپ، تىكۇشاقپەن اسكەري كەمەگە جەتكىزىلدى. ەكيپاج الداعى ۋاقىتتا مەديتسينالىق تەكسەرۋدەن ءوتۋ ءۇشىن جەردەگى ورتالىقتارعا جىبەرىلەدى.
ميسسياعا ريد ۋەيزمەن، ۆيكتور گلوۆەر، كريستينا كوح، دجەرەمي حانسەن ەسىمدى ءتورت عارىشكەر قاتىستى. ولاردىڭ ساپارى شامامەن 10 كۇنگە سوزىلىپ، ادامزات تاريحىنداعى ەڭ الىس ۇشۋلاردىڭ ءبىرى بولدى.
