ريم پاپاسى XIV لەۆ اقش پرەزيدەنتى دونالد ترامپ تاراپىنان ايتىلعان سىنعا قاراماستان، بەيبىتشىلىككە شاقىرۋىن توقتاتپايتىنىن مالىمدەدى. ول حالىقارالىق قاۋىمداستىقتى سوعىستاردى توقتاتىپ، ديالوگ پەن كەلىسسوزدەرگە كوشۋگە ۇندەدى، دەپ حابارلايدى “ادىرنا”.
ريم پاپاسىنىڭ ايتۋىنشا، قازىرگى الەمدە قارۋلى قاقتىعىستاردىڭ سالدارىنان بەيبىت تۇرعىندار كوپ زارداپ شەگۋدە. ول مەملەكەتتەر اراسىنداعى ماسەلەلەردى شەشۋدىڭ جالعىز دۇرىس جولى – كوپجاقتى ىنتىماقتاستىق پەن اشىق ديالوگ ەكەنىن اتاپ ءوتتى.
«مەن سوعىسقا قارسى باتىل تۇردە سويلەۋدى جالعاستىرامىن. بۇگىندە تىم كوپ جازىقسىز ادام قازا تابۋدا. بىرەۋ شىعىپ، بۇدان دا جاقسى جول بار ەكەنىن ايتۋى ءتيىس»، – دەپ ونىڭ ءسوزىن Vatican News كەلتىرەدى.
ول ءوز ۇندەۋىندە تەك دونالد ترامپقا عانا ەمەس، بارلىق الەم كوشباسشىلارىنا جۇگىنىپ، سوعىستاردى توقتاتۋعا جانە بەيبىتشىلىك پەن تاتۋلاسۋ جولىندا بىرلەسىپ جۇمىس ىستەۋگە شاقىردى.
سونىمەن قاتار، ريم پاپاسى ءوزىنىڭ ءدىني ميسسياسىنا ادال ەكەنىن ايتىپ، قانداي دا ءبىر ساياسي قىسىمنان قورىقپايتىنىن جەتكىزدى. ونىڭ پىكىرىنشە، شىركەۋدىڭ باستى مىندەتى – ىنجىلدەگى بەيبىتشىلىك پەن ادامگەرشىلىك قۇندىلىقتاردى ناسيحاتتاۋ.
«مەن ترامپ اكىمشىلىگىنەن قورىقپايمىن جانە ءىنجىلدىڭ ۇندەۋىن اشىق ايتۋدان تايىنبايمىن»، – دەپ اتاپ ءوتتى ول.
ايتا كەتەيىك، بۇعان دەيىن دونالد ترامپ ريم پاپاسىنىڭ يران توڭىرەگىندەگى جاعدايعا قاتىستى ۇستانىمىن قاتاڭ سىنعا العان بولاتىن. ول پاپانىڭ كوزقاراسىمەن كەلىسپەيتىنىن ءبىلدىرىپ، بىرقاتار وتكىر مالىمدەمەلەر جاساعان.
سوڭعى اپتالاردا ريم پاپاسى XIV لەۆ تاياۋ شىعىستاعى شيەلەنىستىڭ كۇشەيۋىنە الاڭداۋشىلىق ءبىلدىرىپ، تاراپتاردى قاقتىعىستى ۋشىقتىرماي، كەلىسسوز ۇستەلىنە وتىرۋعا شاقىرىپ كەلەدى.
