الەۋمەتتىك جەلىدە اتىراۋلىق 23 جاستاعى رايىمبەك داۋىلباەۆ پەن ونىڭ جارىنىڭ اسەرلى ماحاببات حيكاياسى كەڭىنەن تارالىپ، كوپشىلىكتىڭ جۇرەگىن ەلجىرەتتى. ەرلى-زايىپتىلاردىڭ تاعدىرى – اۋىر دەرتپەن كۇرەس، ءۇمىت پەن شىنايى سەزىمنىڭ جەڭىسى تۋرالى وقيعا.
رايىمبەكتىڭ ايتۋىنشا، سىرقات ستۋدەنت كەزىندە باستالعان. ول سول ۋاقىتتا مۋزىكالىق بايقاۋعا دايىندالىپ جۇرگەن. الايدا كۇيزەلىس پەن ۋايىم دەنساۋلىعىنا كەرى اسەر ەتىپ، دارىگەرلەر وعان قاتەرلى ىسىك دياگنوزىن قويعان.
دەرت ۋاقىت وتە اسقىنىپ، شاپ تۇسىنان كەۋدە قۋىسىنا دەيىن تارالعان. كەيىن جاس جىگىت دارىگەرلەردىڭ باقىلاۋىمەن وڭتۇستىك كورەيادا ەم قابىلدايدى. ۇزاق ءارى كۇردەلى ەم-دوم مەن تاباندى كۇرەستىڭ ارقاسىندا ول اۋىر اۋرۋدى جەڭىپ شىققان.
بۇل وقيعا كوپشىلىككە ونىڭ جۇبايىنىڭ Threads پلاتفورماسىندا جاريالاعان جازباسى ارقىلى بەلگىلى بولدى. وندا ول تانىستىقتارىنىڭ ەرەكشە جاعدايدا باستالعانىن بايانداعان.
جۇبايىنىڭ سوزىنشە، ولار رايىمبەك ەم الىپ جاتقان كەزدە تانىسقان.
“كۇيەۋىم راكپەن اۋىرىپ جۇرگەن كەزدە تانىستىق. ول سەۋلدە ەمدەلىپ جاتقانىن، جالعىزسىراپ جۇرگەنىن ايتتى. مەن بىردەن وعان بارامىن دەپ شەشتىم. باردىم. ءسويتىپ، ءبىر-ءبىرىمىزدى قاتتى جاقسى كورىپ قالدىق. كەيىن وعان موتيۆاتسيا بولسىن دەپ: «ەگەر سەن جازىلىپ شىعۋعا ۋادە بەرسەڭ، مەن ساعان تۇرمىسقا شىعۋعا ۋادە بەرەمىن» دەدىم. ەكەۋمىز دە سول ۋادەمىزدە تۇردىق. شۇكىر”، — دەپ جازدى جۇبايى.
بيىل قىستا قوس عاشىق اتىراۋ وبلىسى دوسسور كەنتىندە شاڭىراق كوتەرىپ، جاڭا ومىرگە قادام باستى.
جەلى قولدانۋشىلارى بۇل وقيعانى ءۇمىتتىڭ، ءتوزىمنىڭ جانە شىنايى ماحابباتتىڭ سيمۆولى رەتىندە باعالاپ، جاس جۇبايلارعا اق تىلەكتەرىن جاۋدىرىپ جاتىر.
