بۇگىن، 15 ءساۋىر – مەملەكەت قايراتكەرى، كۇيشى عابدول-حاكىم بوكەيحانوۆتىڭ تۋعان كۇنى، دەپ حابارلايدى «ادىرنا» ءتىلشىسى.
كورنەكتى تۇلعا 1896 جىلى بوكەي ورداسىنىڭ شوڭاي اۋىلىندا دۇنيەگە كەلگەن. ول – بوكەي حاننىڭ ۇرپاعى، الاش كوسەمى ءاليحان بوكەيحاننىڭ ءىنىسى. عابدول-حاكىم نۇرمۇحامەدۇلى بوكەي ورداسىنداعى جاڭگىر حان اشقان مەكتەپتى، ورال اسكەري ۋچيليششەسىن، ماسكەۋدەگى اۋىل شارۋاشىلىعى اكادەمياسىن بىتىرگەن.
1918 جىلى بوكەي ورداسى اتقارۋ كوميتەتى توراعاسىنىڭ ورىنباسارى قىزمەتىن اتقارىپ، 1-ءشى قازاق اتتى اسكەري پولكىن قۇرۋعا تىكەلەي قاتىسقان. 1919 جىلى قازاق رەۆوليۋتسيالىق كوميتەتىنىڭ مۇشەسى رەتىندە كەڭەس وكىمەتى جاعىنا تارتۋ ماقساتىندا الاشوردا جەتەكشىلەرىمەن كەلىسسوز جۇرگىزدى. قازاق رەۆوليۋتسيالىق كوميتەتىنىڭ ۇلتتىق كادرلاردى ىرىكتەپ، قىزمەتكە تاعايىنداۋ كوميسسياسىنىڭ مۇشەسى بولا ءجۇرىپ، كوپتەگەن الاش قوزعالىسى قايراتكەرلەرىن ورتالىق اتقارۋ كوميتەتى مەن حالىق كەڭەسى كوميتەتىندەگى جاۋاپتى قىزمەتتەرگە تاعايىنداۋعا كومەگىن تيگىزگەن. بۇكىلوداقتىق اتقارۋ كوميتەتىندە قازاق رەۆوليۋتسيالىق كوميتەتىنىڭ وكىلى بولعان. ول قۋعىن-سۇرگىنگە ۇشىراپ، 1938 جىلى اتۋ جازاسىنا كەسىلگەن. 1957 جىلى اقتالدى.
بوكەيحانوۆ ءداستۇرلى حالىق مادەنيەتىنىڭ قامقورشىسى بولدى. ا.زاتاەۆيچكە قازاقتىڭ «شالقىما»، « قوس القا»، «مەرگەن»، «سوقىر ەسجان» كۇيلەرىن، «ەكى جيرەن»، «اتىراۋ»، «قاراشاش»، تاعى باسقا جالپى سانى 27 ءانىن جازدىرىپ، داۋلەتكەرەي، سالاۋاتكەرەي جانە ءوزى تاربيەسىن كورگەن الىكەي، ماكار سىندى حالىق كومپوزيتورلارى تۋرالى قۇندى دەرەكتەر بەرگەن.
