لوندون عالىمدارى ۋيليام شەكسپيردىڭ قالاداعى جالعىز مەنشىگى بولعان ءۇيدىڭ ناقتى ورنىن انىقتادى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
الايدا تاريحي عيماراتتىڭ ءوزى بۇگىنگە دەيىن ساقتالماعان.
زەرتتەۋشى ليۋسي مانرو بلەكفرايەرس اۋدانىنداعى ارحيۆتىك قۇجاتتاردى زەرتتەۋ بارىسىندا 1668 جىلى جاسالعان كونە كارتاعا تاپ بولعان. ول كارتادا 1613 جىلى شەكسپير ساتىپ العان ءۇيدىڭ ناقتى ورنى مەن اۋماعى كورسەتىلگەن.
مالىمەتتەرگە سايكەس، شەكسپير بۇل ءۇيدى ءومىرىنىڭ سوڭعى جىلدارى، ولەرىنەن ءۇش جىل بۇرىن ساتىپ العان. ءۇي قازىرگى لوندون سيتي اۋماعىنداعى بلەكفرايەرس ماڭىندا، «گلوبۋس» تەاترىنا جاقىن جەردە ورنالاسقان.
بۇعان دەيىن زەرتتەۋشىلەر دراماتۋرگ بۇل كەزەڭدە تۋعان قالاسى ستراتفورد-نا-ەيۆونعا تولىق ورالعان دەپ ەسەپتەگەن. الايدا جاڭا دەرەك شەكسپيردىڭ لوندوندا ءجيى بولىپ، تەاتر ومىرىنە بەلسەندى ارالاسقانىن كورسەتەدى.
قازىرگى تاڭدا ول ءۇي تۇرعان اۋماقتا XIX عاسىردا سالىنعان عيماراتتار ورنالاسقان. دەگەنمەن سەنت-ەندريۋس-حيلل كوشەسىندەگى شەكسپيرگە ارنالعان كوك ەسكەرتكىش تاقتا ءدال سول تاريحي ورىنعا قويىلعانى انىقتالدى.
