قازاقستان پرەزيدەنتىنىڭ ارنايى وكىلى ەرجان قازىحان اقش-قا جاساعان رەسمي ساپارى اياسىندا ماركو رۋبيومەن كەلىسسوزدەر جۇرگىزدى، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
كەزدەسۋ بارىسىندا قازىحان قاسىم-جومارت توقاەۆتىڭ اتىنان دونالد ترامپقا سالەمىن جەتكىزىپ، قازاقستان مەن اقش اراسىنداعى قارىم-قاتىناستىڭ قارقىندى دامىپ كەلە جاتقانىن اتاپ ءوتتى.
سونداي-اق ساياسي ديالوگتىڭ تۇراقتىلىعى مەن پراكتيكالىق ىنتىماقتاستىقتىڭ كەڭەيۋىنە ەرەكشە ءمان بەرىلدى.
تاراپتار 2025 جىلدىڭ قاراشا ايىندا اق ءۇيدىڭ سوپاق كابينەتىندە وتكەن ەكى ەل كوشباسشىلارىنىڭ كەزدەسۋىندە قول جەتكىزىلگەن ۋاعدالاستىقتاردى ىسكە اسىرۋ ماسەلەسىن تالقىلادى. ونىڭ ىشىندە شامامەن 20 ميلليارد دوللاردى قۇرايتىن بىرلەسكەن ينۆەستيتسيالىق جوبالارعا نازار اۋدارىلدى.
كەلىسسوزدەر بارىسىندا قازاقستاننىڭ حالىقارالىق قاۋىپسىزدىك پەن بەيبىتشىلىكتى قامتاماسىز ەتۋ باعىتىنداعى باستامالارى، ەلدەگى اۋقىمدى ساياسي جانە الەۋمەتتىك-ەكونوميكالىق رەفورمالار تۋرالى اقپارات بەرىلدى. اقش تاراپى ءوز كەزەگىندە ەكىجاقتى ىنتىماقتاستىقتىڭ قازىرگى دەڭگەيىنە جوعارى باعا بەرىپ، ونى ودان ءارى تەرەڭدەتۋگە دايىن ەكەنىن ءبىلدىردى.
كەزدەسۋ قورىتىندىسى بويىنشا تاراپتار ساۋدا-ەكونوميكالىق جانە ينۆەستيتسيالىق بايلانىستاردى كۇشەيتىپ، كەڭەيتىلگەن ستراتەگيالىق سەرىكتەستىكتى دامىتۋعا ۋاعدالاستى.
سونىمەن قاتار، ەرجان قازىحان امەريكالىق ارىپتەسىن قازاقستانعا رەسمي ساپارمەن كەلۋگە شاقىردى.
