شارا اياسىندا وبلىس مەكتەپتەرىنىڭ وقۋشىلارى قورشاعان ورتانى قورعاۋ بويىنشا ءوز جوبالارى مەن يدەيالارىن ۇسىندى.
اۋقىمدى ءىس-شارا «كەلەشەك مەكتەپتەرى» ۇلتتىق جوباسى اياسىندا سالىنعان №80 ورتا مەكتەپ بازاسىندا ءوتىپ، جاس ۇرپاق اراسىندا ەكولوگيالىق قۇندىلىقتاردى ناسيحاتتاۋدىڭ جارقىن الاڭىنا اينالدى.
ەكوفەستيۆالگە قاتىسقان ءوڭىر باسشىسى اسحات شاحاروۆ ەكولوگيالىق مادەنيەتتى ەرتە جاستان قالىپتاستىرۋ ماڭىزدى ەكەنىن ايتىپ، مۇنداي باستامالار تابيعاتقا جاۋاپكەرشىلىكپەن قاراۋدى تاربيەلەۋگە ىقپال ەتەتىنىن جەتكىزدى.
اكىم سونداي-اق ەكى جىل بۇرىن مەملەكەت باسشىسىنىڭ باستاماسىمەن «تازا قازاقستان» جالپىۇلتتىق جوباسى ىسكە قوسىلعانىن ەسكە سالدى. بۇگىندە بۇل باستاما ەل ايماقتارىندا كەڭ قولداۋ تاۋىپ، اقتوبە وبلىسىندا بەلسەندى جۇزەگە اسىرىلىپ كەلەدى.
«تازا قازاقستان» اكتسياسى وزەكتى ەكولوگيالىق ماسەلەلەر - اۋماقتاردى تازالاۋ، كوگالداندىرۋ جانە ەكولوگيالىق مادەنيەتتى قالىپتاستىرۋعا باعىتتالعان. تازالىق ارقايسىمىزدان باستالادى جانە كۇندەلىكتى ءومىردىڭ اجىراماس بولىگى بولۋى ءتيىس.
فەستيۆالدە ۇسىنىلعان جوبالار قاتىسۋشىلاردىڭ جوعارى دايىندىق دەڭگەيىن جانە شىنايى قىزىعۋشىلىعىن كورسەتتى. «جاسىل بالاباقشا»، «جاسىل مەكتەپ»، «جاسىل كوللەدج» سياقتى باستامالار ەكولوگيالىق تاربيەنىڭ ءبىلىم بەرۋ جۇيەسىنىڭ ماڭىزدى بولىگىنە اينالۋدا، وعان سىزدەر - دالەلسىزدەر. اسىرەسە جاستاردىڭ بەلسەندىلىگى قۋانتادى. سىزدەردىڭ باستامالارىڭىز بەن جوبالارىڭىز ەل بولاشاعىن ويلايتىن جاۋاپتى، بەيجاي قارامايتىن ۇرپاقتىڭ ءوسىپ جاتقانىن كورسەتەدى»، – دەدى اكىم.
ەكوفەستيۆال باعدارلاماسى اياسىندا قوناقتار بىرقاتار ماڭىزدى جوبامەن تانىستى. بالاباقشالار، مەكتەپتەر جانە كوللەدجدەر ۇسىنعان باستامالار ءبىلىم بەرۋدىڭ بارلىق دەڭگەيىندە ەكولوگيالىق تاربيەنىڭ ساباقتاستىعىن تانىتتى. اسىرەسە ەكوجوبالار كورمەسى مەن «ەكو-ART» جاس سۋرەتشىلەر ەكسپوزيتسياسى ۇلكەن قىزىعۋشىلىق تۋدىرىپ، وندا شىعارماشىلىق ارقىلى وزەكتى ەكولوگيالىق ماسەلەلەر كوتەرىلدى.
ءىس-شارانىڭ جارقىن ساتتەرىنىڭ ءبىرى «كۇن نۇرىنان تۋعان جاسىل الەم» تاقىرىبىنداعى فلەشموب بولدى. ول قاتىسۋشىلاردى تابيعاتتى ساقتاۋ جانە تۇراقتى بولاشاق يدەياسى توڭىرەگىندە بىرىكتىردى. فلەشموب بارىسىندا العاش رەت «تازا قازاقستان» اكتسياسىنا ارنالعان گيمن ورىندالدى.
سونداي-اق، ايماق باسشى وقۋشى، ءبىلىم سالاسىنىڭ ارداگەرلەرى جانە ءماسليحاتتاردىڭ دەپۋتاتتارىمەن بىرگە №80 مەكتەپ اۋلاسىنا كوشەتتەر وتىرعىزدى.
ايتا كەتەيىك، وڭىردە وبلىس اكىمىنىڭ باستاماسىمەن «مەكتەپ ورمانشىلىعى» جوباسى بەلسەندى جۇزەگە اسىرىلۋدا. ونىڭ اياسىندا وقۋشىلار كوشەت وتىرعىزىپ، ولاردى كۇتىپ-باپتايدى، وسىلايشا ەكولوگيالىق تاربيەنى تاجىريبە جۇزىندە مەڭگەرىپ، تابيعاتقا دەگەن قامقورلىقتى ەرتە جاستان قالىپتاستىرادى. سونداي-اق ەكولوگيالىق تاربيە وبلىس بالاباقشالارىنان باستاۋ الادى، وندا بالالارعا قورشاعان ورتاعا جاۋاپكەرشىلىكپەن قاراۋ ەرتە جاستان ۇيرەتىلەدى.
